فیلڈ مارشل عاصم منیر کی ترک لینڈ فورسز کمانڈر سے جی ایچ کیو میں ملاقات

راولپنڈی: فیلڈ مارشل سید عاصم منیر سے ترک لینڈ فورسز کے کمانڈر جنرل میتن توکیل نے جنرل ہیڈکوارٹرز (جی ایچ کیو) راولپنڈی میں ملاقات کی ہے۔

پاک فوج کے شعبہ تعلقات عامہ (آئی ایس پی آر) کے مطابق معزز مہمان کی آمد پر پاک فوج کے چاق و چوبند دستے نے انہیں گارڈ آف آنر پیش کیا۔

ملاقات کے دوران پاکستان اور ترکیہ کے درمیان دفاعی تعاون، علاقائی سیکیورٹی صورتحال اور پیشہ ورانہ امور پر تفصیلی تبادلہ خیال کیا گیا۔

فیلڈ مارشل عاصم منیر نے پاکستان اور ترکیہ کے تاریخی، ثقافتی اور اسٹریٹجک تعلقات کو اجاگر کرتے ہوئے دونوں ممالک کی مسلح افواج کے درمیان مضبوط دفاعی اشتراک کو سراہا۔

آئی ایس پی آر کے مطابق ترک لینڈ فورسز کے کمانڈر نے نیول ہیڈکوارٹرز اسلام آباد میں چیف آف نیول اسٹاف ایڈمرل نوید اشرف اور ایئر ہیڈکوارٹرز میں ایئر چیف مارشل ظہیر احمد بابر سدھو سے بھی ملاقاتیں کیں۔

ان ملاقاتوں میں پیشہ ورانہ امور اور خطے کی بحری و فضائی سیکیورٹی صورتحال پر تبادلہ خیال کیا گیا۔