فیفا کے سابق صدر سیپ بلاٹر اور فرانس کے لیجنڈری فٹبالر مشیل پلاٹینی کو منگل کے روز سوئٹزرلینڈ کی ایک عدالت نے بدعنوانی کے الزامات سے بری کر دیا۔ یہ فیصلہ ان کے خلاف جاری مقدمے میں ڈھائی سال بعد سامنے آیا، جس میں انہیں پہلی بار 2022 میں بھی بے گناہ قرار دیا گیا تھا۔
کینیڈا کے انتخابات میں چین اور بھارت کی ممکنہ مداخلت، روس اور پاکستان میں بھی صلاحیت موجود، کینیڈین انٹیلی جنس
بلاٹر اور پلاٹینی، جو کبھی عالمی فٹ بال کی سب سے بااثر شخصیات میں شمار ہوتے تھے، کو باسل کے قریب متینز (Muttenz) کی عدالت نے دھوکہ دہی کے الزامات سے مکمل طور پر صاف قرار دے دیا۔ یہ سماعت سوئس فیڈرل پراسیکیوٹرز کی جانب سے 2022 کی بریت کے خلاف اپیل کے بعد ہوئی۔
پلاٹینی کے وکیل ڈومینک نیلن نے فیصلے پر تبصرہ کرتے ہوئے کہا،
"دو مرتبہ بری ہونے کے بعد، اب سوئس اٹارنی جنرل کے دفتر کو بھی سمجھ جانا چاہیے کہ یہ مقدمہ ناکام ہو چکا ہے۔ مائیکل پلاٹینی کو اب مستقل طور پر اس معاملے سے بری الذمہ قرار دیا جانا چاہیے۔”
یہ کیس 2011 میں 2 ملین سوئس فرانک (2.26 ملین ڈالر) کی ادائیگی سے متعلق تھا، جو پلاٹینی کو 1998 سے 2002 کے درمیان کیے گئے مشاورتی کام کے لیے ادا کی گئی تھی۔ پلاٹینی کے مطابق، یہ ادائیگی اس وقت موخر کر دی گئی تھی کیونکہ فیفا کے پاس مکمل ادائیگی کے لیے فنڈز دستیاب نہیں تھے۔
یہ اسکینڈل 2015 میں سامنے آیا، جب پلاٹینی یورپی فٹ بال کے حکمراں ادارے UEFA کے صدر تھے۔ یہ مقدمہ نہ صرف سیپ بلاٹر کے زوال کا باعث بنا، بلکہ پلاٹینی کی فیفا صدارت کی دوڑ سے بھی دستبرداری کا سبب بنا۔
نیلن نے مزید کہا:
"یہ مقدمہ قانونی کے ساتھ ساتھ مائیکل پلاٹینی کے لیے شدید ذاتی اور پیشہ ورانہ نقصانات کا باعث بھی بنا۔ اس بے بنیاد مقدمے کی وجہ سے وہ 2016 میں فیفا کے صدر منتخب ہونے سے محروم ہو گئے، حالانکہ ان کے خلاف کوئی ٹھوس شواہد کبھی پیش نہیں کیے گئے۔”
پس منظر:
یہ کیس فیفا میں بدعنوانی کے بڑے اسکینڈلز کا حصہ تھا، جن کی وجہ سے 2015 میں بلاٹر کو فٹ بال کی عالمی گورننگ باڈی سے نکال دیا گیا تھا اور پلاٹینی کو بھی فٹ بال سرگرمیوں سے معطل کر دیا گیا تھا۔ تاہم، حالیہ فیصلے سے ثابت ہوا کہ ان کے خلاف کوئی مجرمانہ شواہد نہیں تھے۔