کراچی فش ہاربر کو اپریل کے پہلے ہفتے میں یورپی یونین (ای یو) کے آڈٹ سے قبل بہتر بنانے کا کام تیزی سے جاری ہے۔ یورپی کمیشن کے ڈائریکٹر برائے صحت اور خوراک، آڈٹ اور تجزیہ کی ٹیم ماہی گیری کی مصنوعات برآمد کرنے والے اداروں کی سہولتوں کا جائزہ لے گی۔
نیوزی لینڈ نے پاکستان کو 115 رنز سے شکست دے کر ٹی ٹوئنٹی سیریز جیت لی
یورپی کمیشن کے معیارات کی تعمیل کا جائزہ
میرین فشریز ڈپارٹمنٹ (ایم ایف ڈی) نے متعلقہ حکام کو آگاہ کیا ہے کہ یہ آڈٹ یورپی معیارات پر عمل درآمد کی جانچ کرے گا، جس میں ماہی گیری کی کشتیوں، لینڈنگ سائٹس، نیلامی ہال، پروسیسنگ یونٹس، اسٹوریج اور برآمدی مراحل کا مکمل معائنہ شامل ہوگا۔
ایم ایف ڈی نے کراچی فش ہاربر اتھارٹی (کے ایف ایچ اے) اور فشرمین کوآپریٹو سوسائٹی لمیٹڈ (ایف سی ایس ایل) کو ہدایت دی کہ وہ یورپی یونین کی ضروریات کے مطابق بنیادی سہولتوں کو بہتر کریں، تاکہ برآمدات پر کسی ممکنہ پابندی سے بچا جا سکے۔
فش ایکسپورٹرز یورپی آڈٹ کے لیے تیار
پاکستان فشری ایکسپورٹرز ایسوسی ایشن (پی ایف ای اے) کے چیئرمین محمد ظفر اقبال کنڈی نے بتایا کہ فش پروسیسنگ یونٹس اور برآمد کنندگان آڈٹ کے لیے مکمل طور پر تیار ہیں۔ فی الحال صرف 4 برآمد کنندگان کو یورپی یونین کو ماہی گیری کی مصنوعات برآمد کرنے کی اجازت حاصل ہے، جبکہ مزید 3 اداروں نے منظوری کے لیے درخواستیں جمع کرا رکھی ہیں۔
انہوں نے مزید کہا کہ اگر برآمد کنندگان کی تعداد 12 تک بڑھ جائے تو پاکستان یورپی یونین کے ممالک سے سالانہ 200 سے 300 ملین ڈالر کا زرمبادلہ کما سکتا ہے۔
کراچی فش ہاربر میں بہتری کے اقدامات
کے ایف ایچ اے کے منیجنگ ڈائریکٹر زاہد کھیمٹیو کے مطابق، بندرگاہ کو یورپی معیارات کے مطابق بنانے کے لیے دیگر سرکاری ادارے بھی اپنا کردار ادا کر رہے ہیں۔
بندرگاہ پر صفائی ستھرائی کے لیے سندھ سالڈ ویسٹ مینجمنٹ بورڈ متحرک ہے، جبکہ غیر قانونی تجاوزات کے خلاف آپریشن بھی کیا گیا ہے۔ 611 ماہی گیری کشتیوں کو یورپی یونین کے معیار کے مطابق بہتر بنایا گیا ہے اور آڈٹ کے دوران ان کشتیوں کو پیش کیا جائے گا۔
مزید برآں، نیلامی ہالوں میں جدید اسٹین لیس اسٹیل ٹرالیاں، پلاسٹک پیلٹ، مچھلی کے ڈبے اور ٹوکریاں فراہم کی جا رہی ہیں، جبکہ غیر فعال ماہی گیری کشتیوں کو ہٹا کر چینل کو صاف کرنے کا کام بھی جاری ہے۔
برآمدات میں اضافہ ممکن
مالی سال 2025ء کے پہلے 8 ماہ میں پاکستان کی مچھلی اور ماہی گیری کی مصنوعات کی برآمدات 26 کروڑ 35 لاکھ ڈالر رہیں، جبکہ گزشتہ سال اسی عرصے میں 26 کروڑ 20 لاکھ ڈالر تھیں۔
پی ایف ای اے کے مطابق، پاکستانی برآمد کنندگان کو چین میں اسکوئڈ کی فی کلو قیمت 3 ڈالر ملتی ہے، جبکہ یورپی مارکیٹ میں یہ 6 ڈالر تک پہنچ سکتی ہے، جس سے پاکستان کو بہتر منافع حاصل ہوسکتا ہے۔
یورپی یونین 6 ارب ڈالر کی ممکنہ مارکیٹ ہے، جہاں پاکستانی جھینگے، اسکوئڈ اور کٹل فش کی بڑی طلب موجود ہے۔ اگر مزید برآمد کنندگان کو منظوری مل جائے تو پاکستان کی ماہی گیری کی برآمدات میں نمایاں اضافہ ممکن ہوگا۔