بنوں کینٹ حملے میں ہلاک ہونے والے مزید تین افغان دہشت گردوں کی شناخت ہوگئی ہے۔ تفتیشی ذرائع کے مطابق، تمام دہشتگردوں کا تعلق افغانستان کے مختلف علاقوں سے تھا۔
پاکستان اور جنوبی افریقہ کی فضائیہ کے مابین دفاعی تعاون بڑھانے پر اتفاق
ذرائع کے مطابق، حملے میں مارے جانے والے دہشتگرد عبدالرزاق حجران المعروف اظہر کی شناخت ہوئی ہے جو افغانستان کے صوبہ پکتیا کے ضلع زرمت کے کالا گو بازار کا رہائشی تھا۔
دوسرا دہشتگرد انصار اللہ المعروف طیب تھا، جو میدان سحر وردگ کا رہنے والا تھا اور خودکش حملہ آور کے طور پر حملے میں شریک تھا۔
تیسرا ہلاک دہشتگرد عتیق اللہ صافی نکلا جو کابل کے پل چرخی علاقے کا رہائشی تھا۔ تحقیقات کے مطابق، عتیق اللہ نے عسکری تربیت جیش فرسان محمد کے تربیت کاروں سے حاصل کی تھی اور اس کی تربیت کے دوران لی گئی تصاویر بھی منظر عام پر آگئی ہیں۔
ذرائع نے بتایا کہ کابل کی ایک مسجد میں عتیق اللہ صافی کے لیے خصوصی دعائیہ تقریب بھی منعقد کی گئی۔ عتیق اللہ صافی کے قریبی رشتہ داروں میں بھائی فرزاد، عاشق، اور شفیق صافی شامل ہیں۔
سیکیورٹی اداروں کے مطابق یہ حملہ کالعدم تنظیم گل بہادر گروپ کی جانب سے کیا گیا تھا، جبکہ بنوں کینٹ حملے کی مزید تحقیقات جاری ہیں۔