انسدادِ منشیات فورس (اے این ایف) نے ملک کے مختلف شہروں اور تعلیمی اداروں میں منشیات اسمگلنگ کے خلاف کامیاب کریک ڈاؤن کرتے ہوئے 8 مختلف کاروائیوں کے دوران 10 ملزمان کو گرفتار کر لیا۔ اے این ایف حکام کے مطابق، کارروائیوں کے دوران 588.072 کلوگرام سے زائد منشیات برآمد کی گئی، جس کی مالیت 16 کروڑ روپے سے زائد بتائی جا رہی ہے۔
اورنگی نالے کے اطراف دوبارہ غیرقانونی تعمیرات، سینئر کلرک محمد انیق کا مرکزی کردار بے نقاب
تعلیمی اداروں میں کارروائی:
ناظم آباد کراچی میں کارروائی کے دوران ایک ملزم کو گرفتار کیا گیا جس کے قبضے سے 2 کلو گرام چرس برآمد ہوئی۔
گرفتار ملزم نے طلباء کو منشیات فروخت کرنے کا اعتراف بھی کیا۔
دیگر بڑی کارروائیاں:
اسلام آباد انٹرنیشنل ایئرپورٹ پر دوحہ جانے والے مسافر کے ٹرالی بیگ سے 1.172 کلوگرام آئس برآمد۔
کولاچی روڈ کراچی پر جرمنی سے آنے والے کنٹینر سے 460 کلوگرام کیٹا مائن پکڑی گئی، جو اب تک کی بڑی برآمدگیوں میں شامل ہے۔
جی ٹی روڈ گوجرانوالہ پر ٹرک اور موٹر سائیکل سے 51.6 کلوگرام چرس اور 4.8 کلوگرام افیون برآمد، 3 ملزمان گرفتار۔
ایم ون موٹر وے اسلام آباد کے قریب گاڑی سے 60 کلوگرام چرس پکڑی گئی، 2 ملزمان گرفتار۔
شمالی بائی پاس پشاور میں چارسدہ روڈ کے قریب ملزم کے قبضے سے 6 کلوگرام چرس برآمد۔
ایم ون موٹر وے اسلام آباد پر خاتون کے قبضے سے 1.9 کلوگرام آئس برآمد۔
ایم ون موٹر وے ٹول پلازہ اسلام آباد پر مسافر بس میں سوار ملزم کے جوتوں سے 600 گرام چرس برآمد۔
مقدمات اور تحقیقات:
اے این ایف ترجمان کے مطابق، گرفتار ملزمان کے خلاف انسدادِ منشیات ایکٹ کے تحت مقدمات درج کر لیے گئے ہیں اور تحقیقات کا آغاز کر دیا گیا ہے تاکہ منشیات کی سپلائی چین کو توڑا جا سکے۔
ترجمان کا بیان:
ترجمان اے این ایف کا کہنا ہے کہ نوجوان نسل کو منشیات کے زہر سے بچانا اولین ترجیح ہے، اور اس مشن کے تحت تعلیمی اداروں میں بھی کارروائیاں جاری رہیں گی۔
