بلوچستان (تشکر نیوز) — جعفر ایکسپریس پر ہونے والے دہشتگردانہ حملے کے بعد بازیاب ہونے والے مسافروں نے پاک فوج اور فرنٹیئر کانسٹیبلری (ایف سی) کے جوانوں کی دلیری، جرات اور پیشہ ورانہ مہارت کو زبردست خراجِ تحسین پیش کیا ہے۔
مسافروں نے بتایا کہ ایف سی کے جوانوں نے نہ صرف بروقت کارروائی کر کے ان کی جان بچائی بلکہ بازیابی کے بعد ہر ممکن سہولت اور دیکھ بھال بھی فراہم کی۔ مسافروں کے مطابق ایف سی کے اہلکاروں نے ان کے روزے کا بھی خاص خیال رکھا، افطاری اور کھانے کا انتظام کیا اور نفسیاتی و جسمانی بحالی کے لیے بھی فوری اقدامات کیے۔
ایک بازیاب مسافر نے بتایا:
"ہم پنیر ریلوے اسٹیشن سے مال گاڑی کے ذریعے مشک پہنچے ہیں۔ ایف سی کے جوانوں نے ہمارا بہت خیال رکھا، روزہ افطار کروایا، کھانا دیا اور حفاظت کے تمام انتظامات کیے۔”
دوسرے مسافر کا کہنا تھا:
"سانحہ جعفر ایکسپریس کے بعد پاک آرمی اور ایف سی نے ہمیں سبی پہنچایا، جہاں سے ہمیں پنجاب روانہ کیا جائے گا۔ ان کی مہربانی اور مدد کو الفاظ میں بیان نہیں کیا جا سکتا۔”
مسافروں کے مطابق حملہ اچانک ہوا، پہلے ایک زور دار دھماکہ ہوا جس کے فوراً بعد فائرنگ شروع ہو گئی۔ حملہ آٹھ نمبر ٹنل کے قریب کیا گیا، جہاں دہشتگردوں نے بم دھماکہ کرکے ریلوے ٹریک کو بھی نقصان پہنچایا۔
ایک مسافر نے مزید بتایا:
"ایف سی کے جوانوں نے فوری کارروائی کرتے ہوئے ڈیڑھ سے دو سو کے قریب مسافروں کو بحفاظت بازیاب کرایا۔ ہم ان کے شکر گزار ہیں۔”
بازیاب مسافروں نے کہا کہ ایف سی نے نہایت پیشہ ورانہ مہارت کے ساتھ آپریشن کیا اور دہشتگردوں کے نرغے سے جان بچائی۔
تمام بازیاب افراد نے پاک فوج اور ایف سی کے جوانوں کا دل سے شکریہ ادا کیا اور ان کی بے لوث قربانی اور بہادری کو سراہا۔
