آئی جی سندھ غلام نبی میمن کی زیر صدارت اندرون سندھ کے اضلاع میں ماڈل پولیس اسٹیشنز کی موجودہ صورتحال اور ان کے افتتاح سے متعلق اجلاس سینٹرل پولیس آفس کراچی میں منعقد ہوا۔ اجلاس میں ایڈیشنل آئی جی ویلفیئر اینڈ ورکس، ڈی آئی جیز، فائنانس، ہیڈکوارٹرز، اے آئی جیز، اسٹیٹ مینجمنٹ، آپریشنز، ایم اینڈ پی آر نے بالمشافہ شرکت کی، جبکہ ڈی آئی جیز حیدرآباد، سکھر، میرپورخاص، شہیدبینظیر آباد اور متعلقہ ضلعی ایس ایس پیز نے وڈیو لنک کے ذریعے اجلاس میں شرکت کی۔
سندھ کے سینئر وزیر شرجیل انعام میمن کی میڈیا سے گفتگو
اجلاس میں ڈویژنل ڈی آئی جیز اور ضلعی ایس ایس پیز نے ماڈل پولیس اسٹیشنز کی مرمت، تزین و آرائش، دستیاب سہولیات اور افتتاحی اقدامات سے متعلق تفصیلی بریفنگ دی۔ آئی جی سندھ غلام نبی میمن نے تمام ماڈل پولیس اسٹیشنز کی تزین و آرائش کے امور کو جلد از جلد مکمل کرنے کی ہدایت کی۔
انہوں نے مزید کہا کہ تمام ماڈل پولیس اسٹیشنز میں خوش اخلاق، شائستہ گفتار، عوام دوست اور تجربہ کار اسٹاف تعینات کیا جائے اور پولیس اسٹیشنز میں خوشگوار ماحول اور صفائی ستھرائی کا خاص خیال رکھا جائے۔
رمضان کی آمد کو مدنظر رکھتے ہوئے سیکورٹی کے غیر معمولی انتظامات کرنے کی ہدایت دیتے ہوئے آئی جی سندھ نے عادی مجرمان اور مفرور ملزمان کی گرفتاری کے لیے کوششیں مزید تیز کرنے کی ضرورت پر زور دیا، کیونکہ زیادہ تر جرائم میں عادی مجرمان اور مفرور ملزمان ملوث ہوتے ہیں۔
