وزیر خزانہ محمد اورنگزیب نے ساؤتھ چائنا مارننگ پوسٹ کو دیے گئے انٹرویو میں پاکستان کے معاشی استحکام، چینی سرمایہ کاری کی اہمیت، اور سی پیک کے اگلے مراحل کے حوالے سے اہم اعلانات کیے۔
وزیرِاعظم کا کابینہ اجلاس سے خطاب، توانائی، تعلیم، پی آئی اے اور امن و امان پر اہم اعلانات
یوآن بانڈز اور کریڈٹ ریٹنگ میں بہتری
وزیر خزانہ نے کہا کہ مصر کی طرز پر یوآن بانڈز کے اجرا کے لیے ایشین انفرا اسٹرکچر انویسٹمنٹ بینک سے بات چیت جاری ہے۔ پاکستان اپنی کریڈٹ ریٹنگ کو سنگل ’بی‘ میں تبدیل کرنے کے لیے پرعزم ہے تاکہ عالمی سطح پر اعتماد بحال ہو۔
سی پیک کا اگلا مرحلہ
انہوں نے سی پیک کے اگلے مرحلے میں اسپیشل اکنامک زونز، زراعت، اور انفارمیشن ٹیکنالوجی کے شعبوں میں وسعت لانے کی خواہش کا اظہار کیا۔ وزیر خزانہ نے چینی نجی شعبے کو پاکستان میں برآمدی صنعتیں منتقل کرنے اور ملک کو برآمدی مرکز بنانے کی دعوت دی۔
معاشی توازن اور چینی سرمایہ کاری کا تحفظ
محمد اورنگزیب نے کہا کہ درآمدی معیشت کی وجہ سے پاکستان کو زرمبادلہ کی کمی کا سامنا ہے، لیکن چینی کمپنیوں کے تحفظ کے لیے سیکیورٹی میں اضافہ کیا جا رہا ہے۔ انہوں نے زور دیا کہ غیر ملکی سرمایہ کاروں کے لیے پاکستان میں سازگار حالات پیدا کیے جا رہے ہیں۔
ہانگ کانگ کے ساتھ شراکت داری
وزیر خزانہ نے ہانگ کانگ کے ساتھ کاروباری شراکتوں کو فروغ دینے کی ضرورت پر زور دیا۔ ہانگ کانگ چیف ایگزیکٹو جان لی کاچیو سے ملاقات کے حوالے سے بتایا کہ پاکستانی کمپنیاں ہانگ کانگ اسٹاک ایکسچینج میں لسٹنگ کے ذریعے کیپٹل اکٹھا کر سکتی ہیں۔
بین الاقوامی تجارت اور سرمایہ کاری میں اضافہ
انہوں نے کہا کہ دو طرفہ تجارتی تعلقات اور سرمایہ کاری کو فروغ دینے کے لیے ہانگ کانگ کے سرمایہ کاروں کو پاکستان کا دورہ کرایا جائے گا۔ پاکستانی کمپنیوں کو لندن اسٹاک ایکسچینج کے ساتھ ساتھ ہانگ کانگ کے مواقع سے فائدہ اٹھانا چاہیے۔