تشکر نیوز: پاکستان رینجرز پنجاب کا ایک اور اہلکار، لانس نائیک محمد تنویر، 25 اور 26 نومبر کے دوران ہونے والے پرتشدد واقعات میں شدید زخمی ہونے کے بعد شہید ہو گیا۔ 37 سالہ شہید محمد تنویر کا تعلق نارووال سے تھا اور انہوں نے 17 سال تک دفاع وطن کے مقدس فریضے کی انجام دہی کی۔ ان کے سوگواران میں اہلیہ، دو بیٹے اور تین بیٹیاں شامل ہیں۔
ملک میں امن و امان حکومت کی اولین ترجیح ہے، محسن نقوی
25 اور 26 نومبر کو احتجاج کی آڑ میں پی ٹی آئی کارکنان کے پرتشدد حملوں نے ناقابل تلافی نقصان پہنچایا۔ ان واقعات کے نتیجے میں پاکستان رینجرز کے 4 اہلکار شہید اور متعدد زخمی ہو چکے ہیں۔ پنجاب پولیس کے 2 اہلکار شہید اور 119 اہلکار زخمی ہوئے، جبکہ اسلام آباد پولیس کے 11 اہلکار شدید زخمی ہوئے۔
حکام کے مطابق، ان واقعات کی کئی ویڈیوز منظرعام پر آ چکی ہیں جن میں مظاہرین کو مختلف مقامات پر آگ لگاتے اور توڑ پھوڑ کرتے دیکھا گیا ہے۔ متعلقہ اداروں نے ایسے عناصر کے خلاف سخت قانونی کارروائی کا اعلان کیا ہے تاکہ قانون کی بالادستی کو یقینی بنایا جا سکے۔