کراچی، 19 دسمبر 2024: وزیر بلدیات سندھ سعید غنی سے آباد کے چیئرمین حسن بخشی کی قیادت میں سندھ کے مختلف اضلاع سے آباد کے عہدیداروں کے وفد نے ملاقات کی۔ ملاقات کے دوران وفد نے صوبائی وزیر کو حیدرآباد سمیت سندھ کے دیگر اضلاع میں واسا، ایچ ڈی اے اور ایس بی سی اے کے حوالے سے درپیش مسائل سے آگاہ کیا۔
آئی سی سی نے چیمپئنز ٹرافی 2025 کے لیے پاک بھارت فیوژن فارمولے کا اعلان کردیا
وزیر بلدیات سعید غنی نے اس موقع پر کہا کہ "ہماری بھرپور کوشش ہوگی کہ تعمیراتی شعبے سے وابستہ بلڈرز کو زیادہ سے زیادہ سہولیات ان کی دہلیز تک فراہم کی جاسکیں۔” انہوں نے مزید کہا کہ "حیدرآباد ڈویلپمنٹ اتھارٹی، واسا اور سندھ بلڈنگ کنٹرول اتھارٹی حیدرآباد کے حوالے سے بلڈرز کو درپیش ہر قسم کے مسائل کا جلد از جلد حل نکالا جائے گا۔”
سعید غنی نے اس عزم کا اظہار کیا کہ موجودہ سندھ حکومت کی بھرپور کوشش ہے کہ عوام کو سستی اور بہترین رہائشی سہولتیں فراہم کی جائیں۔ انہوں نے آباد کو بھی عوام کو سستی اور اچھی رہائش کی سہولت کی فراہمی کے لئے اپنا کردار ادا کرنے کی ضرورت پر زور دیا۔
"موجودہ سندھ حکومت کے وژن کے مطابق عوام کو اچھی اور سستی رہائشی سہولتیں فراہم کرنا ہماری اولین ترجیح ہے،” سعید غنی نے کہا۔ انہوں نے مزید کہا کہ جہاں سندھ حکومت اپنا کردار ادا کر رہی ہے، وہیں تعمیراتی صنعت سے وابستہ بلڈرز کو بھی اپنا بھرپور کردار ادا کرنا ہوگا۔
وفد کے ساتھ ملاقات میں آباد کے سندھ ریجن کے جو مسائل واسا، ایچ ڈی اے اور ایس بی سی اے سے متعلق ہیں ان کے تدارک کے لئے وزیر بلدیات نے کہا کہ "جلد ہی حیدرآباد یا کراچی میں ان تمام محکموں کے سربراہان کا اجلاس طلب کر کے ان مسائل کے حل کو یقینی بنایا جائے گا۔”
انہوں نے یہ بھی کہا کہ "آباد صوبے کی تعمیراتی شعبے میں ایک اہم حیثیت کا حامل ادارہ ہے اور ہم چاہتے ہیں کہ یہ ادارہ غیر قانونی تعمیرات کی حوصلہ شکنی کے لئے اقدامات کرے۔”
سعید غنی نے اپنے خطاب میں مزید کہا کہ "ہماری کوشش ہمیشہ سے رہی ہے کہ تعمیراتی شعبے سے وابستہ افراد کو ہر ممکن سہولتیں فراہم کی جائیں اور جہاں کہیں بھی آباد یا تعمیراتی شعبے سے وابستہ افراد کی کوتاہیاں ہوں، ان کا ازالہ کیا جائے گا۔”
وفد میں آباد کے وائس چیئرمین طارق عزیر، سب ریجن کے چیئرمین عبداللہ جان، سابق سب ریجن چیئرمینز ذوالفقار اور کاشف کے علاوہ کمیٹی ممبران بھی شامل تھے۔
