راولپنڈی (تشکر نیوز) – پاک فوج اور چین کی پیپلز لبریشن آرمی کے درمیان مشترکہ جنگی مشق ’’واریئر 8‘‘ کا آغاز پبی میں نیشنل کاؤنٹر ٹیررازم سینٹر میں کیا گیا۔ اس مشق کا مقصد دونوں افواج کے مابین پیشہ ورانہ مہارتوں کا تبادلہ اور انسداد دہشت گردی کے حوالے سے تعاون کو فروغ دینا ہے۔
بنوں میں دہشتگردوں کے خلاف لڑتے ہوئے 11 فوجی شہید، نماز جنازہ ادا
پاک فوج کے شعبہ تعلقات عامہ (آئی ایس پی آر) کے مطابق یہ مشقیں پاک فوج اور چین کی پیپلز لبریشن آرمی کے درمیان انسداد دہشت گردی کی تربیت کے سلسلے کی آٹھویں مشق ہیں، جو دونوں ملکوں کے درمیان دفاعی تعلقات کی مزید استحکام کی علامت ہیں۔
مشق کے آغاز کی افتتاحی تقریب میں لیفٹیننٹ جنرل شاہد امتیاز، کمانڈر راولپنڈی کور نے بطور مہمان خصوصی شرکت کی۔ اس موقع پر دونوں ملکوں کے فوجی افسران نے ایک دوسرے کے تجربات سے استفادہ کرنے اور دہشت گردی کے خلاف مل کر لڑنے کے حوالے سے حکمت عملیوں پر تبادلہ خیال کیا۔
آئی ایس پی آر نے مزید بتایا کہ یہ مشق دونوں ملکوں کی افواج کے مابین مزید ہم آہنگی پیدا کرنے اور فوجی تعلقات کو مزید مستحکم کرنے میں اہم کردار ادا کرے گی۔
