اسلام آباد: پاکستان میں ڈیجیٹل حقوق کے لیے کام کرنے والی شخصیات اور مذہبی اسکالرز نے اسلامی نظریاتی کونسل (سی آئی آئی) کی جانب سے ورچوئل پرائیویٹ نیٹ ورک (وی پی این) کے استعمال کو غیر اسلامی قرار دینے کے حکم پر شدید ردعمل ظاہر کیا ہے۔
امریکی قانون سازوں کا بائیڈن سے عمران خان سمیت سیاسی قیدیوں کی رہائی کا مطالبہ
تشکر نیوز کی رپورٹ کے مطابق، جمعے کو اسلامی نظریاتی کونسل کے سربراہ ڈاکٹر راغب نعیمی نے ایک بیان میں کہا کہ وی پی این کا استعمال غیر اخلاقی یا غیر قانونی مواد تک رسائی کے لیے شریعت کے خلاف ہے۔ انہوں نے پارلیمنٹ کو اسلامی تعلیمات کے مطابق قانون سازی کرنے کا مشورہ بھی دیا۔ تاہم، کونسل کے ایک رکن نے بتایا کہ یہ بیان دراصل ڈاکٹر راغب نعیمی کے ذاتی خیالات تھے اور یہ کونسل کا باضابطہ فیصلہ نہیں تھا۔
ٹیکنالوجی کا استعمال مذہبی مسئلہ نہیں: ماہرین
اسلامی نظریاتی کونسل کے بیان کے باوجود وفاقی و صوبائی حکام اور متعدد ادارے وی پی این کے ذریعے اپنے سوشل میڈیا اکاؤنٹس چلا رہے ہیں، بشمول وزیراعظم ہاؤس، وزارت مذہبی امور، وزارت آئی ٹی اور وزارت اطلاعات۔
اس حوالے سے ممتاز مذہبی اسکالر مولانا طارق جمیل نے سوشل میڈیا پر اپنے ایک بیان میں کہا کہ اگر "ایڈلٹ” یا گستاخانہ مواد دیکھنا غیر اسلامی سمجھا جاتا ہے تو پھر وی پی این کو غیر اسلامی قرار دینے سے پہلے موبائل فونز کو بھی غیر اسلامی قرار دیا جانا چاہیے۔
نیاٹیل کے سی ای او وہاج سراج نے کہا کہ ٹیکنالوجی ہمیشہ غیر جانبدار ہوتی ہے، اور صرف اس کا صحیح یا غلط استعمال اسے حلال یا حرام بناتا ہے۔
ڈیجیٹل حقوق کے تحفظ کے لیے آوازیں
ڈیجیٹل رائٹس فاؤنڈیشن کی ایگزیکٹو ڈائریکٹر نگہت داد نے کہا کہ وی پی این کو بلاک کرنے کی کوشش آئین میں دیے گئے رازداری کے حقوق سے متصادم ہے۔ انہوں نے اس اقدام کو سوشل میڈیا صارفین کو نشانہ بنانے کی کوشش قرار دیا۔
سینیٹ کی قائمہ کمیٹی برائے آئی ٹی اور ٹیلی کام کی سربراہ سینیٹر پلوشہ خان نے 18 نومبر کو کمیٹی کا اجلاس طلب کر لیا ہے جس میں وی پی این کے غیر قانونی استعمال کے حوالے سے پاکستان ٹیلی کمیونیکیشن اتھارٹی (پی ٹی اے) کے فیصلوں پر بحث کی جائے گی۔ سینیٹر پلوشہ خان نے سوال اٹھایا کہ کیا پی ٹی اے صارفین کے دیکھے گئے مواد کی نگرانی کرے گا۔
سیاسی ردعمل
مجلس وحدت مسلمین (ایم ڈبلیو ایم) کے سربراہ سینیٹر علامہ ناصر عباس نے کہا کہ پاکستان میں ایک "نااہل اور کرپٹ اشرافیہ” حکومت کر رہی ہے جو عوام کی حقیقی نمائندہ نہیں ہے۔ سینیٹر راجا ناصر عباس نے اس فیصلے کو حکومت کی جانب سے اپنی مرضی کے مطابق قوانین بنانے اور حکمنامے جاری کرنے کی کوشش قرار دیا۔
