سندھ بھر میں منشیات فروشوں کے خلاف بھرپور آپریشن کا فیصلہ، کل سے مرحلہ وار آپریشن شروع ہوگا

تشکر نیوز:  سندھ کے سینئر وزیر شرجیل انعام میمن نے منشیات فروشوں کے خلاف بھرپور آپریشن کا فیصلہ کرتے ہوئے کل سے مرحلہ وار آپریشن شروع کرنے کے احکامات جاری کر دیے ہیں۔ اس آپریشن کا مقصد سندھ کے مختلف علاقوں میں منشیات کی اسمگلنگ اور فروخت کو روکنا ہے۔

اپوزیشن لیڈر سندھ علی خورشیدی کی سندھ سالڈ ویسٹ مینیجمنٹ بورڈ کی ناقص کارکردگی پر شدید تشویش

شرجیل انعام میمن نے کہا کہ پہلے مرحلے میں کراچی اور حیدرآباد میں آپریشن شروع کیا جائے گا، جس کے بعد دیگر اضلاع میں بھی آپریشن کا دائرہ وسیع کیا جائے گا۔ انہوں نے اپنے احکامات میں واضح کیا کہ اس آپریشن میں خاص طور پر کرسٹل، آئس، ہیروئن، کوکین اور چرس جیسے منشیات کا خاتمہ ہر صورت میں یقینی بنانا ہوگا۔

شرجیل انعام میمن نے کہا کہ پولیس اور رینجرز ایکسائز نارکوٹکس کنٹرول کی ٹیموں کے ساتھ بھرپور تعاون فراہم کریں گے۔ اس آپریشن میں سندھ کے نارکوٹکس کنٹرول ونگ کی نفری کو بھی طلب کر لیا گیا ہے۔

انہوں نے کہا کہ نئے انسداد منشیات قانون کے بعد ایکسائز نارکوٹکس کنٹرول کی ذمہ داریوں میں اضافہ ہوا ہے، اور اب ہم سب کی مشترکہ ذمہ داری ہے کہ اپنی آئندہ نسلوں کو منشیات سے بچانے اور ایک منشیات سے پاک معاشرہ بنانے کے لیے اپنا کردار ادا کریں۔

شرجیل انعام میمن نے مزید کہا کہ انسداد منشیات کی ونگ کو مضبوط اور مثالی بنانا ہماری اولین ترجیح ہے، اور جو اہلکار اس مہم میں اچھا کام کریں گے، انہیں انعامات اور اعزازات سے نوازا جائے گا۔

انہوں نے کہا کہ وہ اس آپریشن کی کارکردگی کو خود مانیٹر کر رہے ہیں اور روزانہ کی بنیاد پر آپریشن کی رپورٹ طلب کریں گے تاکہ اس مہم میں کسی قسم کی کوتاہی نہ ہو۔

شرجیل انعام میمن نے اپنے پیغام میں کہا کہ "منشیات کے خلاف کی جانے والی کوششوں کو اطمینان کا احساس اور خوشی ہوتی ہے، اور ہمیں اپنے معاشرتی ذمہ داریوں کا بھرپور ادراک کرتے ہوئے ان کو عملی شکل دینی ہے۔”