تشکر نیوز: وفاقی وزیر قانون اعظم نذیر تارڑ نے 26ویں آئینی ترمیم کو متفقہ قرار دیتے ہوئے کہا ہے کہ سپریم کورٹ کے چیف جسٹس کی تقرری اب تین سال کے لیے ہوگی، اور یہ تقرری تین سینئر ترین ججوں میں سے کی جائے گی۔ اس تقرری کا حتمی فیصلہ 12 رکنی کمیٹی کرے گی، جس میں پارلیمنٹ اور سینیٹ کے حکومتی و اپوزیشن اراکین شامل ہوں گے۔ کمیٹی دو تہائی اکثریت سے نام فائنل کر کے وزیراعظم کو بھیجے گی۔
26ویں آئینی ترمیم کی منظوری: اسلام آباد میں سیکیورٹی مزید سخت، پی ٹی آئی کا بائیکاٹ
وفاقی وزیر قانون نے میڈیا سے گفتگو میں بتایا کہ پارلیمانی لیڈروں کے درمیان مسلسل ملاقاتوں اور طویل مشاورت کے بعد آئینی ترمیم کا مسودہ تیار کیا گیا۔ بلاول بھٹو زرداری اور مولانا فضل الرحمٰن نے اہم کردار ادا کیا، دونوں نے اتحادی جماعتوں اور قانونی ٹیموں کے ساتھ مل کر اس ترمیم کو کامیاب بنایا۔
تارڑ نے کہا کہ جے یو آئی (ف) کی جانب سے اسلامی قوانین سے متعلق پانچ ترامیم پیش کی گئیں، جن میں شریعت کورٹ کے ججز کی سپریم کورٹ میں تقرری کے حوالے سے ایک شق شامل کی گئی ہے۔ مزید برآں، اسلامی نظریاتی کونسل کی رپورٹوں کے حوالے سے ٹائم لائن کو ایک سال کر دیا گیا ہے، اور سود سے متعلق شریعت کورٹ کے فیصلے پر عملدرآمد کو بھی شامل کیا گیا ہے۔
انہوں نے کہا کہ آئینی بینچز کی تشکیل کا اختیار صوبائی اسمبلیوں کو دیا گیا ہے، جو 51 فیصد اکثریت سے قرارداد منظور کر کے اس کا قیام کر سکتی ہیں۔ بینچز کی نامزدگی چیف جسٹس کی سربراہی میں جوڈیشل کمیشن کرے گا، جس میں پارلیمنٹ، سینیٹ، اور عدلیہ کے اراکین شامل ہوں گے۔
چیف جسٹس کی تقرری کا طریقہ کار بھی تبدیل کیا گیا ہے، جس میں ججز کی پرفارمنس کا جائزہ لیا جائے گا اور ناقص کارکردگی والے ججز کے کیسز سپریم جوڈیشل کونسل کو بھیجے جائیں گے، جسے چھ ماہ میں فیصلہ کرنا ہوگا۔
اعظم نذیر تارڑ نے کہا کہ چیف جسٹس کی تقرری تین سال کے لیے ہوگی یا ریٹائرمنٹ کی عمر 65 سال ہونے تک۔ انہوں نے اس بات پر زور دیا کہ اس ترمیم کا مقصد عدلیہ کے نظام میں شفافیت اور احتساب کو یقینی بنانا ہے۔
وزیر اطلاعات عطاتارڑ نے بھی اس موقع پر کہا کہ پارلیمان کی بالادستی اور جمہوری عمل کے تحفظ کے لیے یہ آئینی ترمیم ایک تاریخی پیشرفت ہے۔
