تشکر نیوز: ایران کے سپریم لیڈر آیت اللہ خامنہ ای نے ملت اسلامیہ کی حفاظت کے لیے ایک مضبوط دفاعی لکیر قائم کرنے کی ضرورت پر زور دیتے ہوئے کہا ہے کہ تمام اسلامی ممالک کو متحد ہونا ہوگا۔ انہوں نے یہ بات جمعہ کی نماز کے اجتماع سے خطاب کرتے ہوئے کہی، جو پانچ سال بعد منعقد ہوا۔
وفاقی وزیرداخلہ محسن نقوی: “احتجاج کا حق ہے لیکن اس طریقے سے نہیں”
آیت اللہ خامنہ ای نے حماس کے سربراہ اسمٰعیل ہنیہ اور لبنان میں حزب اللہ کے رہنما حسن نصر اللہ کی اسرائیلی حملوں میں شہادت پر خراج تحسین پیش کیا۔ ان کا کہنا تھا کہ "ملت اسلامیہ کے دشمنوں کے آپریشن روم ایک جگہ پر ہیں اور وہ ایک ہی ذریعے سے معلومات حاصل کرتے ہیں۔”
انہوں نے غزہ میں جاری اسرائیلی مظالم کی مذمت کرتے ہوئے کہا کہ "اسرائیل وہاں خون کی ہولی کھیل رہا ہے۔” آیت اللہ خامنہ ای نے مطالبہ کیا کہ اسلامی ممالک کو افغانستان سے یمن، ایران، غزہ، اور لبنان تک اپنی خودمختاری کا دفاع کرنے کا حق ہے۔
انہوں نے سید حسن نصر اللہ کی شہادت کو ایک بڑا نقصان قرار دیتے ہوئے کہا کہ "ان کا جسم ہمارے درمیان سے جا چکا، لیکن ان کی روح اور نظریہ آج بھی موجود ہے۔” آیت اللہ خامنہ ای نے یہ بھی کہا کہ "ہمیں اپنے ایمان کو مضبوط کرتے ہوئے دشمن کے خلاف کھڑا ہونا چاہیے۔”
ایران کے سپریم لیڈر نے مسلمانوں کی ذمہ داری قرار دی کہ وہ لبنان کے جہادیوں کی مدد کریں اور مسجد الاقصیٰ کے لیے جنگ کی حمایت کریں۔ انہوں نے یہ بھی اعلان کیا کہ 7 اکتوبر کا حملہ جائز تھا، اور اگر ضرورت ہوئی تو مستقبل میں بھی اسرائیل کو جواب دینے میں دیر نہیں لگائیں گے۔
آیت اللہ خامنہ ای نے امریکی پالیسیوں کو تنقید کا نشانہ بناتے ہوئے کہا کہ صہیونی ریاست کا وجود صرف امریکی حمایت کی وجہ سے قائم ہے اور یہ کہ اسرائیلی ریاست کو زمین سے اکھاڑ پھینکا جائے گا۔ انہوں نے یقین دلایا کہ صہیونی ریاست کبھی بھی حزب اللہ اور حماس پر فتح یاب نہیں ہو سکے گی۔
یاد رہے کہ یکم اکتوبر کو ایران نے لبنان میں اپنی حمایت یافتہ تنظیم حزب اللہ کے خلاف اسرائیل کی جارحیت کا جواب دیتے ہوئے متعدد بیلسٹک میزائل فائر کیے تھے۔ اس کے جواب میں اسرائیلی وزیراعظم نیتن یاہو نے کہا تھا کہ ایران کی یہ کارروائی بڑی غلطی ہے اور تہران کو اس کی بھاری قیمت چکانی پڑے گی۔