تشکرنیوز: وفاقی حکومت نے اعلان کیا ہے کہ دسمبر 2024 میں گرین لائن بس سروس کا انتظام حکومت سندھ کو منتقل کیا جائے گا۔ اس حوالے سے سندھ حکومت نے گرین لائن بس سروس کے آپریشنز سنبھالنے کے لیے تیاریاں مکمل کر لی ہیں۔ کراچی میں سندھ کے سینئر وزیر شرجیل انعام میمن کی زیر صدارت ایک اعلیٰ سطحی اجلاس منعقد ہوا، جس میں سیکریٹری ٹرانسپورٹ اسد ضامن، ماس ٹرانزٹ اتھارٹی کے ایم ڈی کمال حکیم دایو، سی ای او ٹرانس کراچی شمائلہ محسن اور دیگر اعلیٰ حکام نے شرکت کی۔
ادارہ شماریات کی رپورٹ: گزشتہ ہفتے مہنگائی کی شرح میں 13.18 فیصد اضافہ
اجلاس میں گرین لائن بس سروس کے آپریشنز کا تفصیلی جائزہ لیا گیا اور وزیر شرجیل انعام میمن کو منصوبے پر تفصیلی بریفنگ دی گئی۔ اجلاس کے دوران گرین لائن کو اورنج لائن سے جوڑنے والے منصوبے پر بھی تفصیلی گفتگو ہوئی اور وزیر شرجیل انعام میمن نے ہدایات جاری کیں کہ اس منصوبے کو جلد از جلد مکمل کیا جائے۔
اجلاس میں پبلک ٹرانسپورٹ کے شعبے میں سندھ حکومت کے جاری آپریشنز، یوٹیلیٹی سروسز، اور گرین لائن بس سروس کے لیے سبسڈیز پر بھی تبادلہ خیال کیا گیا۔ شرجیل انعام میمن نے کہا کہ گرین لائن بس سروس کراچی کے پبلک ٹرانسپورٹ نظام کا ایک اہم حصہ ہے اور دسمبر 2024 میں وفاقی حکومت اسے سندھ حکومت کے حوالے کر دے گی۔ انہوں نے مزید کہا کہ حکومت سندھ کا ہدف ہے کہ گرین لائن اور اورنج لائن کو جوڑنے والا منصوبہ دسمبر 2024 سے پہلے مکمل ہو جائے۔
وزیر شرجیل انعام میمن نے یہ بھی کہا کہ وفاقی حکومت کی جانب سے گرین لائن کے آپریشنز کے لیے سالانہ 2 ارب روپے کی سبسڈی فراہم کی جا رہی ہے، جس پر سندھ حکومت نظرثانی کرے گی۔ حکومت سندھ کے حوالے ہونے کے بعد گرین لائن بس سروس میں مزید بسیں شامل کی جائیں گی تاکہ شہریوں کو بہتر اور موثر ٹرانسپورٹ سہولیات فراہم کی جا سکیں۔ انہوں نے اس بات پر زور دیا کہ سندھ حکومت کے پہلے سے جاری پبلک ٹرانسپورٹ منصوبوں کی بدولت عوام کو بڑا ریلیف ملا ہے اور ٹرانسپورٹ کے نظام میں مزید بہتری لانے کی کوششیں جاری ہیں تاکہ شہریوں کو زیادہ سے زیادہ سہولت فراہم کی جا سکے۔