لاہور میں وفاقی تحقیقاتی ایجنسی (ایف آئی اے) نے انٹیلی جنس ایجنسیوں کی معاونت اور وزیر داخلہ محسن نقوی کی ہدایات پر عمل کرتے ہوئے انسانی اسمگلنگ میں ملوث ایک بین الاقوامی گروہ کو گرفتار کر لیا ہے۔ یہ گروہ معصوم لوگوں کو بیرون ملک ملازمتوں کا جھانسہ دے کر دھوکہ دہی سے کروڑوں روپے لوٹ چکا تھا۔ حکام کے مطابق، ملزمان جعلی دستاویزات اور پاسپورٹ تیار کرنے میں مہارت رکھتے تھے، اور اس مقصد کے لیے انہوں نے اپنا پرنٹنگ پریس بھی قائم کر رکھا تھا۔
کابل میں چائے کا کپ پاکستان کو مہنگا پڑ گیا، اسحٰق ڈار
مزید برآں، اس گروہ پر دینی بنیادوں پر جھوٹی گواہیاں تیار کرنے کا بھی الزام ہے، جنہیں پناہ گزینوں کے لیے بیرون ملک استعمال کیا جاتا تھا۔ دوران تفتیش بھارتی ایجنٹوں کی جانب سے پاکستان کو بدنام کرنے کی ایک سازش بھی سامنے آئی، جس میں بھارتی اور افغان شہری ملوث تھے۔ اس سازش کا مقصد پاکستانی پاسپورٹ کو عالمی سطح پر بدنام کرنا تھا۔
وفاقی وزیر داخلہ محسن نقوی نے ایف آئی اے اور انٹیلی جنس اداروں کو اس کامیاب آپریشن پر مبارکباد دی اور اسے انسانی اسمگلنگ کے خلاف ایک بڑی کامیابی قرار دیا۔ انہوں نے عزم ظاہر کیا کہ اس قسم کے مزید آپریشن جاری رکھے جائیں گے اور انسانی اسمگلنگ میں ملوث مجرمان کو سختی سے نمٹا جائے گا۔