تشکر نیوز: مسلم لیگ ن کے صدر، میاں نواز شریف نے 500 یونٹس تک بجلی استعمال کرنے والے صارفین کے لیے فی یونٹ 14 روپے ریلیف کا اعلان کیا ہے۔ انہوں نے وزیر اعلیٰ پنجاب مریم نواز کے ہمراہ پریس کانفرنس کرتے ہوئے کہا کہ عوام مہنگائی کی وجہ سے مشکلات کا شکار ہیں۔ مینار پاکستان کے جلسے میں انہوں نے بجلی کے بلوں پر بات کی تھی اور اس دور کی بجلی قیمتوں کا موازنہ آج کے حالات سے کیا۔
اولمپیئن ارشد ندیم کے تاریخی کارنامے پر آرمی چیف کا خراج تحسین، قومی فخر قرار
نواز شریف کا کہنا تھا کہ وہ عوام کی مشکلات کو محسوس کرتے ہیں اور 2017 کی جانب بار بار سوچ جاتے ہیں جب نہ مہنگائی تھی اور بجلی کے بل انتہائی کم تھے۔ 2013 میں ان کی حکومت نے معیشت کو درست سمت میں ڈالا، اور ان کے دور میں سبزیاں 10 روپے فی کلو ملتی تھیں۔ انہوں نے اپنی برطرفی پر ایک بار پھر سوال اٹھایا اور کہا کہ انہیں بیٹے سے تنخواہ نہ لینے پر نکالا گیا۔
صدر مسلم لیگ ن نے آئی ایم ایف کے حوالے سے سابق حکومت پر تنقید کی اور کہا کہ جیل میں بیٹھ کر بڑی باتیں کرنے والے ہی آئی ایم ایف کو دوبارہ لائے۔ انہوں نے مریم نواز اور شہباز شریف کو مہنگائی ختم کرنے کی ہدایت کی اور کہا کہ ان کے دور میں ڈالر 104 روپے کا تھا۔ مریم نواز نے گندم اور آٹے کی قیمتوں میں کمی کی۔
نواز شریف نے مزید کہا کہ ان کی حکومت نے بجلی کی لوڈ شیڈنگ کا خاتمہ کیا اور چین کے تعاون سے نئے بجلی کے کارخانے لگائے۔ ان کے مطابق موجودہ مہنگائی پی ٹی آئی کے دور میں شروع ہوئی۔ انہوں نے دعویٰ کیا کہ اگر ان کا ترقیاتی سفر جاری رہتا تو آج پاکستان ایک ایشین ٹائیگر بن چکا ہوتا۔
انہوں نے بتایا کہ مریم نواز بجلی کے بلوں کے حوالے سے سولر پینل اسکیم لا رہی ہیں اور ان کی حکومت اگست اور ستمبر کے بجلی بلوں میں ریلیف فراہم کرے گی۔ نواز شریف نے اعلان کیا کہ 500 یونٹس تک بجلی استعمال کرنے والے صارفین کو فی یونٹ 14 روپے کا ریلیف ملے گا۔ اس مقصد کے لیے 45 ارب روپے مختص کیے گئے ہیں، جو مختلف ترقیاتی فنڈز سے نکالے جائیں گے۔
ذرائع کے مطابق، اس فیصلے کے بعد لاہور الیکٹرک سپلائی کمپنی کے لاکھوں صارفین کو ریلیف ملے گا۔ لیسکو کے 65 لاکھ سے زائد صارفین میں سے 49 لاکھ گھریلو صارفین ہیں، جنہیں اس ریلیف سے بجلی کے یونٹ کی قیمت 24 روپے ہو جائے گی۔