تشکر نیوز: پنجاب اسمبلی میں سانحہ 9 مئی 2023 کے کرداروں کو سزا دلانے کے لیے قرارداد پیش کی گئی ہے۔
تشکر نیوز کے مطابق، استحکام پاکستان پارٹی کے رکن شعیب صدیقی نے یہ قرارداد پیش کی۔ قرارداد میں انہوں نے 9 مئی کے ماسٹر مائنڈ، منصوبہ سازوں اور ذمہ داران کو سخت سزا دینے کا مطالبہ کیا ہے۔
شعیب صدیقی نے قرارداد میں کہا کہ فوجی تنصیبات اور شہداء کی یادگاروں کی بے حرمتی کرنے والے کسی رعایت کے مستحق نہیں ہیں۔ انہوں نے 9 مئی کو ایک المناک، افسوسناک، دلخراش، ناقابل فراموش سانحہ اور سیاہ ترین دن قرار دیا۔
190 ملین پاؤنڈز کیس: عمران خان کے وکلا کا جج کی تعیناتی پر اعتراض، مزید دلائل طلب
شعیب صدیقی کا کہنا تھا کہ ریاست، ملکی سلامتی، اعلیٰ عدلیہ اور اداروں کے خلاف گھناؤنی سازش بے نقاب ہو چکی ہے۔
یہ واضح رہے کہ 9 مئی 2023 کو سابق وزیراعظم عمران خان کی گرفتاری کے بعد ملک بھر میں پرتشدد فسادات کے نتیجے میں شدید بے امنی دیکھی گئی تھی۔ مشتعل افراد نے مختلف مقامات پر عسکری تنصیبات پر حملے، جلاؤ گھیراؤ اور مظاہرے کیے تھے، اور اس دوران سیکڑوں افراد کو گرفتار کیا گیا تھا۔
