کراچی میں پیشہ ور گداگروں اور منشیات کے عادی افراد کے خلاف کارروائی تیز کر دی گئی ہے۔ کمشنر کراچی سید حسن نقوی کی ہدایت پر ضلعی انتظامیہ اور پولیس نے مختلف علاقوں میں کارروائیاں کیں۔
فیروزآباد میں پولیس کی مدد سے کارروائی کے دوران 33 پیشہ ور گداگر اور منشیات کے عادی افراد گرفتار کیے گئے۔ انتظامیہ کے مطابق گرفتار افراد کو بعد ازاں فلاحی ادارے کے حوالے کر دیا گیا۔
کارروائی ایم اے جناح روڈ، خداداد کالونی، پریڈی اسٹریٹ اور دیگر علاقوں میں کی گئی۔ انتظامیہ نے چوراہوں اور مارکیٹوں کے اطراف پیشہ ور گداگروں کی موجودگی کے باعث شہریوں کو درپیش مشکلات کو کارروائی کی ایک اہم وجہ قرار دیا ہے۔
کمشنر کراچی سید حسن نقوی نے کہا کہ شہریوں کو چوراہوں اور مارکیٹوں کے اطراف پیشہ ور گداگروں سے پریشانی کا سامنا ہے۔ انہوں نے متعلقہ افسران کو ایسے عناصر کی روک تھام کے لیے مؤثر اقدامات کی ہدایت کی۔
انہوں نے جنوبی، شرقی اور دیگر اضلاع میں بھی پیشہ ور گداگروں کے خلاف کارروائیاں مؤثر بنانے کی ہدایت کی۔ کمشنر کراچی نے ڈپٹی کمشنرز کو اپنے اپنے اضلاع میں کارروائیاں یقینی بنانے کا حکم دیا۔
