کسٹمز انفورسمنٹ: پاکستان کسٹمز نے کہا ہے کہ مالی سال 2025-26 کے دوران کسٹمز انفورسمنٹ کلکٹریٹ حیدرآباد نے اسمگلنگ کے خلاف کارروائیوں میں نمایاں پیش رفت کی، جس کے نتیجے میں ضبطگی کی مجموعی کارروائیوں میں گزشتہ مالی سال کے مقابلے میں 25 فیصد اضافہ ریکارڈ کیا گیا۔
پاکستان کسٹمز کے مطابق سال بھر میں اسمگلنگ کے 914 مقدمات درج کیے گئے، جن میں 4.555 ارب روپے مالیت کا اسمگل شدہ سامان ضبط کیا گیا۔ ضبط شدہ اشیاء پر عائد ڈیوٹی اور ٹیکسز کی مالیت 1.964 ارب روپے رہی، جو گزشتہ مالی سال کے مقابلے میں 11 فیصد زیادہ ہے۔
اعداد و شمار کے مطابق نان ڈیوٹی پیڈ گاڑیوں کی ضبطگی میں 60 فیصد اضافہ ریکارڈ کیا گیا، جبکہ چھالیہ کی ضبط شدہ مالیت میں 18 فیصد اضافہ ہوا۔ اس کے برعکس پیٹرولیم مصنوعات کی ضبط شدہ مالیت میں 57 فیصد اور گٹکے کی ضبطگی کی مالیت میں 37 فیصد کمی سامنے آئی۔
پاکستان کسٹمز نے مالی سال کے دوران ضبط شدہ سامان کی 954 لاٹس نیلام کیں، جو گزشتہ سال کے مقابلے میں 129 فیصد زیادہ ہیں۔ ان نیلامیوں سے 1.329 ارب روپے کی آمدنی حاصل ہوئی، جبکہ مختلف انتظامی اقدامات کے ذریعے مجموعی وصولیاں 1.354 ارب روپے تک پہنچ گئیں، جو گزشتہ سال کے مقابلے میں 94 فیصد زیادہ ہیں۔
رپورٹ کے مطابق سال بھر میں 864.781 ملین روپے مالیت کی ممنوعہ اشیاء تلف کی گئیں۔ اس مقصد کے لیے دو خصوصی تقریبات منعقد کی گئیں، جن میں مجموعی طور پر 640 لاٹس پر مشتمل ممنوعہ سامان کو ضابطے کے مطابق تلف کیا گیا۔
پاکستان کسٹمز نے بتایا کہ حیدرآباد کلکٹریٹ کے تحت قائم چھ ڈیجیٹل اور موبائل انفورسمنٹ اسٹیشنز مکمل طور پر فعال ہو چکے ہیں۔ اس کے علاوہ حیدرآباد اور سکھر میں انفراسٹرکچر کی بہتری کے متعدد منصوبے بھی مکمل کیے گئے، جن کا مقصد انسدادِ اسمگلنگ کی استعداد کو مزید مضبوط بنانا ہے۔
پاکستان کسٹمز کا کہنا ہے کہ ادارہ اسمگلنگ کے خلاف مؤثر کارروائیاں جاری رکھنے، قومی محصولات کے تحفظ کو یقینی بنانے اور جدید انفورسمنٹ نظام کے ذریعے سرحدی نگرانی کو مزید مؤثر بنانے کے لیے پُرعزم ہے۔
