کراچی: قومی ٹیم کے سابق کپتان شاہد آفریدی نے آل راؤنڈر شاداب خان کو مشورہ دیا ہے کہ وہ سابق کرکٹرز پر جوابی بیانات دینے کے بجائے اپنی کارکردگی سے ناقدین کو خاموش کریں۔
ڈی آئی جی ٹریفک کراچی کا مختلف ٹریفک پوائنٹس کا دورہ، بہترین کارکردگی پر افسران کو نقد انعام
یہ بیان اُس وقت سامنے آیا جب شاداب خان نے بھارت کے خلاف شکست کے بعد ہونے والی تنقید پر ردعمل دیتے ہوئے کہا تھا کہ سابق کھلاڑی وہ کچھ نہیں کر سکے جو موجودہ ٹیم نے کیا، کیونکہ پاکستان نے ورلڈ کپ میں بھارت کو شکست دی ہے۔
ایک نجی ٹی وی پروگرام میں گفتگو کرتے ہوئے شاہد آفریدی نے کہا کہ شاداب اپنے ساتھی کھلاڑیوں کی کامیابیوں کا دفاع کرنے میں حق بجانب ہیں، تاہم ICC Men’s T20 World Cup 2021 میں بھارت کے خلاف تاریخی فتح کے بعد ٹیم عزت اور دباؤ کو سنبھالنے میں کامیاب نہ ہو سکی۔
آفریدی کا کہنا تھا کہ 2021 کے بعد ٹیم اندرونی مسائل، انفرادی دباؤ اور اجتماعی نظم و ضبط کو مؤثر انداز میں نہیں سنبھال سکی، جس کے اثرات کارکردگی پر پڑے۔ انہوں نے کہا کہ عزت ملنے کے بعد اسے برقرار رکھنا زیادہ مشکل ہوتا ہے۔
سابق کپتان نے شاداب کو یاد دلایا کہ جب وہ خراب فارم کے باعث ٹیم سے باہر تھے تو کئی سابق کرکٹرز نے ان کی کھل کر حمایت کی۔ آفریدی نے کہا کہ ہم ٹی وی پر بیٹھ کر کہتے تھے کہ شاداب ٹیم کی ریڑھ کی ہڈی ہے، اس کے اوورز اہم ہیں اور وہ بیٹنگ میں بھی کردار ادا کر سکتا ہے۔
انہوں نے اپنے کیریئر کا حوالہ دیتے ہوئے کہا کہ انہیں بھی شدید تنقید اور مخالفانہ رویوں کا سامنا کرنا پڑا، لیکن انہوں نے کارکردگی کے ذریعے جواب دیا۔ آفریدی نے مزید کہا کہ شاداب نے ڈومیسٹک کرکٹ کے بغیر قومی ٹیم میں جگہ بنائی اور آج بھی سابق کھلاڑی اس کی حمایت کر رہے ہیں۔
آخر میں شاہد آفریدی نے واضح کیا کہ بہترین جواب میدان میں کارکردگی ہے۔ “پرفارم کرو، پھر جواب دو، تاکہ ہم بھی خاموش ہو جائیں۔”
واضح رہے کہ کولمبو میں نمیبیا کے خلاف فتح کے بعد پریس کانفرنس میں شاداب خان نے کہا تھا کہ سابق کرکٹرز لیجنڈز ہیں، مگر ورلڈ کپ میں بھارت کے خلاف وہ کامیابی حاصل نہ کر سکے جو موجودہ ٹیم نے حاصل کی۔