کراچی (اسٹاف رپورٹر) ڈی آئی جی ایسٹ زون ڈاکٹر فرخ علی نے جشنِ آزادی کے سلسلے میں کشمیر روڈ پر واقع دارالسکون میں منعقدہ تقریب میں بطور مہمانِ خصوصی شرکت کی۔ اس موقع پر دارالسکون کے منتظم سہیل رانا اور انتظامیہ نے انہیں اسپیشل بچوں کی رہائش، دیکھ بھال اور علاج و معالجے سے متعلق تفصیلی بریفنگ دی۔
ڈی آئی جی ڈاکٹر فرخ علی نے دارالسکون میں مقیم بچوں سے ملاقات کی، ان کے سر پر شفقت کا ہاتھ رکھا اور ان کی حوصلہ افزائی کے لیے تحائف بھی تقسیم کیے۔ تقریب میں بچوں نے قومی نغمے اور تقاریر پیش کر کے مہمانوں سے داد وصول کی۔
