پشاور، کراچی، اسلام آباد: انسدادِ منشیات فورس (اے این ایف) نے ملک کے مختلف شہروں میں منشیات اسمگلنگ کے خلاف بڑی کارروائیاں کرتے ہوئے مجموعی طور پر 158.050 کلوگرام منشیات برآمد کرلیں جن کی مالیت 1 کروڑ 87 لاکھ روپے سے زائد بتائی گئی ہے۔ کارروائیوں کے دوران 4 ملزمان کو گرفتار بھی کیا گیا۔
لاڑکانہ پولیس کی جوابی کارروائی، اہلکار کی شہادت کا بدلہ چند گھنٹوں میں، 3 ڈاکو ہلاک
اے این ایف ترجمان کے مطابق 5 مختلف کارروائیوں میں منشیات اسمگلنگ کی کوششیں ناکام بنائی گئیں جن میں تعلیمی اداروں کے اطراف بھی کارروائیاں شامل ہیں۔
تعلیمی اداروں کے قریب کارروائیاں
پشاور کے یونیورسٹی روڈ پر ایک کالج کے قریب موٹر سائیکل سوار ملزم سے 6 کلوگرام افیون برآمد کی گئی۔ گرفتار ملزم نے تفتیش کے دوران انکشاف کیا کہ وہ تعلیمی اداروں کے طلباء کو منشیات فراہم کرتا تھا۔
دیگر کامیاب کارروائیاں
کراچی کے ایک کوریئر آفس میں آسٹریلیا بھیجے جانے والے پارسل سے 1 کلوگرام آئس (کرسٹل میتھ) برآمد کی گئی، جب کہ پشاور میں ایک اور کوریئر آفس سے 250 گرام آئس پارسل میں چھپائی گئی حالت میں برآمد ہوئی۔
اسلام آباد کے گولڑہ موڑ کے قریب دو ملزمان کے قبضے سے 3.450 کلوگرام چرس اور 950 گرام آئس ضبط کی گئی۔
پشاور کے رنگ روڈ کے قریب گاڑی کی تلاشی کے دوران 96 کلوگرام چرس اور 50.400 کلوگرام افیون برآمد کی گئی، اس کارروائی میں بھی ایک ملزم گرفتار ہوا۔
ترجمان اے این ایف کے مطابق تمام گرفتار ملزمان کے خلاف انسدادِ منشیات ایکٹ کے تحت مقدمات درج کرکے مزید تفتیش شروع کردی گئی ہے۔
