لیورپول کے اسٹار ڈیوگو جوٹا کار حادثے میں جاں بحق شادی کے صرف دو ہفتے بعد المیہ

لیورپول اور پرتگال کی فٹبال ٹیم کے مایہ ناز فارورڈ ڈیوگو جوٹا اسپین کے شمالی علاقے میں ایک خوفناک کار حادثے میں جاں بحق ہو گئے۔ یہ افسوسناک واقعہ ان کی شادی کے صرف پندرہ دن بعد پیش آیا، جس نے فٹبال برادری کو سوگوار کر دیا ہے۔
نیٹ فلیکس کی اسکوئڈ گیم سیزن 3 نے ریلیز کے 3 دن میں نیا عالمی ریکارڈ قائم کر دیا

جوٹا اپنے چھوٹے بھائی، آندرے جوٹا کے ہمراہ سفر کر رہے تھے، جو خود بھی فٹبالر تھے۔ دونوں بھائی A-52 ہائی وے پر اسپین کے صوبہ زمورا میں سرناڈیلا کے قریب حادثے کا شکار ہوئے۔ گاڑی میں آگ بھڑک اٹھی اور ہنگامی خدمات کے موقع پر پہنچنے تک دونوں افراد جان کی بازی ہار چکے تھے۔

حادثے کی تصدیق

کاسٹیلا و لیون کی ایمرجنسی سروس 1-1-2 کے مطابق، "A-52 کے کلومیٹر 65 پر کار حادثے کی کئی کالز موصول ہوئیں، گاڑی میں آگ لگی ہوئی تھی، موقع پر پہنچنے پر دو افراد کو مردہ قرار دیا گیا۔”

زمورا فائر بریگیڈ، ٹریفک پولیس، اور مقامی میڈیکل ایمرجنسی ٹیمیں فوری طور پر موقع پر پہنچیں، لیکن دونوں افراد کو بچایا نہ جا سکا۔

اچانک موت، فٹبال دنیا سوگوار

29 سالہ ڈیوگو جوٹا نے حال ہی میں لیورپول کی جانب سے پریمیئر لیگ 2024–25 ٹائٹل جیتنے میں اہم کردار ادا کیا تھا۔ وہ 2020 میں Wolves سے £42 ملین میں لیورپول منتقل ہوئے تھے۔ ان کے کوچ ارن سلاٹ نے جوٹا کو “ٹیم کی ریڑھ کی ہڈی” قرار دیا تھا۔

یہ افسوسناک سانحہ جوٹا کی شادی کے محض 15 دن بعد پیش آیا۔ انہوں نے حال ہی میں اپنی طویل المدتی ساتھی روت کارڈوسو سے شادی کی تھی، جن سے ان کے تین بچے بھی ہیں۔

حادثے سے صرف ایک دن قبل، جوٹا نے ایک انٹرویو میں کہا تھا:

“میں خود کو دنیا کا خوش قسمت ترین انسان سمجھتا ہوں۔”

لیورپول کا بیان متوقع

ذرائع کے مطابق، لیورپول ایف سی اس وقت غمگین ہے اور ایک باضابطہ بیان جاری کرنے کی تیاری میں ہے۔ فٹبال دنیا کے ستارے، سابق کھلاڑی اور مداح سوشل میڈیا پر گہرے دکھ کا اظہار کر رہے ہیں۔