جیسے جیسے سرحد پار کشیدگی میں کمی آ رہی ہے، بھارت میں پاکستانی فنکاروں کے انسٹاگرام اکاؤنٹس مرحلہ وار بحال کیے جا رہے ہیں۔ حالیہ پیش رفت میں یمنہ زیدی، احد رضا میر اور دانش تیمور جیسے معروف پاکستانی اداکار ایک بار پھر بھارتی صارفین کو انسٹاگرام پر دستیاب ہو گئے ہیں۔
امریکی دفاعی ذخائر کی کمی یوکرین کو میزائل اور اسلحہ کی فراہمی روک دی گئی
سوشل میڈیا پر ان ستاروں کی واپسی نے بھارت میں موجود پاکستانی ڈراموں کے مداحوں کو خوشی سے نہال کر دیا ہے۔ تاہم یہ بحالی مکمل نہیں، کیونکہ ہانیہ عامر، ماہرہ خان اور فواد خان جیسے بڑے نام اب بھی بھارتی انسٹاگرام صارفین کے لیے بلاک ہیں۔ ان کے پرستار اب بھی شدت سے ان کی واپسی کے منتظر ہیں۔
دلچسپی کی بات یہ ہے کہ نہ صرف سوشل میڈیا اکاؤنٹس بلکہ پاکستانی ڈراموں کے معروف یوٹیوب چینلز بھی بھارت میں دوبارہ دستیاب ہو گئے ہیں، جس سے شائقین اپنے پسندیدہ ڈرامے دوبارہ دیکھنے کے قابل ہو گئے ہیں۔
یاد رہے کہ اپریل 2025 میں بھارتی علاقے پہلگام میں ہونے والے ایک دہشت گردانہ حملے کے بعد بھارت میں پاکستانی فنکاروں کے سوشل میڈیا اکاؤنٹس کو بلاک کر دیا گیا تھا۔ اس وقت بھارتی حکومت اور تفریحی صنعت کے مختلف گروپوں نے اس فیصلے کی حمایت کی تھی۔ اس کے ساتھ ہی پاکستانی فنکاروں کے ساتھ جاری کئی فلمی منصوبے اور برانڈ معاہدے بھی منسوخ کر دیے گئے تھے۔
اگرچہ موجودہ بحالی مثبت اشارہ ہے، لیکن اب بھی کئی بڑے پاکستانی فنکار بھارتی سوشل میڈیا فضا سے غائب ہیں، جس کی وجہ سے مکمل تعلق کی بحالی کا عمل ابھی نامکمل ہے۔