اسلام آباد (ترجمان اے این ایف) — اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف 7 بڑی کارروائیاں کرتے ہوئے 12 ملزمان کو گرفتار کر لیا۔ ان کارروائیوں کے دوران مجموعی طور پر 416.405 کلوگرام منشیات برآمد کی گئی جن کی مالیت 51 لاکھ 88 ہزار روپے سے زائد بتائی جا رہی ہے۔
ڈسٹرکٹ ویسٹ پولیس کی بڑی کارروائی: فائرنگ کرکے شہری کو زخمی کرنے والے ملزمان 10 گھنٹوں میں گرفتار
تفصیلات کے مطابق:
ملتان انٹرنیشنل ایئرپورٹ پر قطر جانے والے مسافر کے سامان سے 1.2 کلوگرام چرس برآمد کی گئی، اور ملزم کو موقع پر گرفتار کر لیا گیا۔
مندرا ٹول پلازہ کے قریب ایک گاڑی سے 9.6 کلوگرام چرس برآمد کی گئی، اور 5 افراد کو حراست میں لے لیا گیا۔
لیاقت پور، رحیم یار خان کے قریب گاڑی سے 400 کلوگرام بھنگ برآمد ہوئی، 2 ملزمان گرفتار کیے گئے۔
قصور، لاہور میں ریلوے پھاٹک کے قریب 2 افراد کے قبضے سے 3 کلوگرام ہیروئن برآمد کی گئی۔
حیات آباد، پشاور میں ایک موٹر سائیکل سے 2 کلوگرام آئس برآمد کی گئی۔
اسلام آباد موٹر وے ٹول پلازہ پر پبلک ٹرانسپورٹ میں سوار مسافر سے 355 گرام ایکسٹیسی گولیاں برآمد ہوئیں، ملزم گرفتار۔
اسی مقام پر ایک اور کارروائی میں ایک مسافر سے 250 گرام ویڈ برآمد کی گئی، اور اسے بھی گرفتار کیا گیا۔
ترجمان اے این ایف کے مطابق گرفتار تمام ملزمان کے خلاف انسدادِ منشیات ایکٹ کے تحت مقدمات درج کر لیے گئے ہیں اور مزید تفتیش کا آغاز کر دیا گیا ہے۔
اے این ایف کا کہنا ہے کہ منشیات کے خلاف زیرو ٹالرنس کی پالیسی جاری رہے گی اور ملک کو منشیات سے پاک کرنے کے لیے تمام وسائل بروئے کار لائے جائیں گے۔
