پاکستان میں تعینات ایران کے سفیر رضا امیری مغدام نے وزیراعظم ہاؤس میں وزیر اعظم شہباز شریف سے ملاقات کی۔ یہ ملاقات قومی سلامتی کمیٹی (این ایس سی) کے اہم اجلاس سے قبل ہوئی، جسے خطے میں بڑھتی ہوئی کشیدگی کے تناظر میں اہم سفارتی پیش رفت قرار دیا جا رہا ہے۔
ایران نے این پی ٹی معاہدے سے وابستگی کا اعادہ امریکی حملوں پر بھرپور جواب دینے کا اعلان
ملاقات میں ایران-اسرائیل کشیدگی، علاقائی امن و استحکام اور تازہ ترین جغرافیائی سیاسی صورتحال پر تفصیلی تبادلہ خیال کیا گیا۔ ذرائع کے مطابق ایرانی سفیر نے وزیر اعظم کو ایران، اسرائیل اور امریکہ کے مابین حالیہ تنازعہ پر بریفنگ دی اور تہران کے موقف سے آگاہ کیا۔
وزیر اعظم شہباز شریف نے پاکستان کے اصولی مؤقف کا اعادہ کرتے ہوئے کہا کہ پاکستان خطے میں امن، استحکام اور سفارتی حل کی بھرپور حمایت کرتا ہے۔ ان کا کہنا تھا کہ موجودہ صورتحال میں تمام فریقین کو صبر و تحمل کا مظاہرہ کرتے ہوئے مذاکرات اور سفارتی ذرائع کو ترجیح دینی چاہیے۔
سیاسی و سفارتی ماہرین کے مطابق یہ ملاقات پاکستان کی متوازن خارجہ پالیسی اور بین الاقوامی تعلقات میں فعال سفارتی کردار کی عکاسی کرتی ہے، خاص طور پر ایسے وقت میں جب خطے میں تناؤ اپنی انتہا کو پہنچا ہوا ہے۔