یوتھ کنونشن 2025: اوبن ٹو کی "پاکستان میں بچوں پر ماحولیاتی تبدیلی کے اثرات” رپورٹ جاری، حکومت سے فوری اقدامات کا مطالبہ

کراچی (اسٹاف رپورٹر) یوتھ کنونشن 2025 کے دوران اوبن ٹو (Obun2) نے اپنی اہم رپورٹ "پاکستان میں بچوں پر ماحولیاتی تبدیلی کے اثرات” جاری کر دی۔ دو روزہ کنونشن بیچ لگژری ہوٹل کراچی میں پاکستان فشر فوک فورم (PFF) کے زیرِ اہتمام اور DevCon، SPARC، Gender and Empowerment Organization (GEO) کے تعاون سے منعقد ہوا۔ کنونشن کا مقصد نوجوانوں کے کردار کو اجاگر کرنا اور بچوں پر موسمیاتی تبدیلی کے خطرناک اثرات کی نشاندہی کرنا تھا۔

بی ایس کرمنالوجی طلباء کا اے این ایف ہیڈکوارٹرز کا دورہ، منشیات کے خلاف قومی جدوجہد پر بریفنگ

تحقیق نگار جاویریہ خان کی رپورٹ میں انکشاف کیا گیا کہ 2022 کے سیلاب نے 3 کروڑ 30 لاکھ افراد کو متاثر کیا جن میں نصف سے زائد بچے شامل تھے، جبکہ 26,600 اسکول تباہ اور 20 لاکھ بچوں کی تعلیم متاثر ہوئی۔ 2019 میں فضائی آلودگی سے 1 لاکھ 54 ہزار بچوں کی اموات ہوئیں، اور سیلاب زدہ علاقوں میں بچپن کی شادیوں میں 119 فیصد اضافہ دیکھا گیا۔

اوبن ٹو کے ایگزیکٹو ڈائریکٹر قندیل شجاعت نے کہا کہ یہ اعداد و شمار برباد زندگیوں کی عکاسی کرتے ہیں، اور اب وقت آ گیا ہے کہ ہم ہر بچے کو محفوظ اور بااختیار بنانے کے لیے ٹھوس اقدامات کریں۔

کنونشن میں ماہرین، ماحولیاتی کارکنوں، پالیسی سازوں اور نوجوان رہنماؤں نے شرکت کی۔ Terre des Hommes کے کنٹری ہیڈ سلم دھریجو نے نوجوانوں کی قیادت میں موسمیاتی انصاف کی تحریک کی ضرورت پر زور دیا، جبکہ پاکستان فشر فوک فورم کے چیئرمین مهران علی شاہ نے کہا کہ نوجوان حل کی قیادت کے لیے تیار ہیں۔

رپورٹ میں حکومت کو سفارش کی گئی کہ بچوں کے لیے "چائلڈ کلائمیٹ فنڈ” قائم کیا جائے، موسمیاتی محفوظ اسکولز میں سرمایہ کاری کی جائے، قومی نصاب میں موسمیاتی تعلیم شامل کی جائے اور قدرتی آفات سے متاثرہ علاقوں میں ذہنی و نفسیاتی مدد کو بڑھایا جائے۔

تقریب میں نوجوانوں نے شمسی توانائی، صاف پانی اور مقامی سطح پر حل پیش کیے۔ شرکاء نے حکومت سے مطالبہ کیا کہ رپورٹ کی سفارشات کو قومی پالیسی کا حصہ بنایا جائے اور فوری عملدرآمد یقینی بنایا جائے۔