کراچی (اسٹاف رپورٹر) ڈی جی آئی ایس پی آر لیفٹیننٹ جنرل احمد شریف نے کراچی میں مختلف مذاہب اور سماجی حلقوں کے نمائندوں سے خصوصی ملاقات کی، جس میں قومی اتحاد، ہم آہنگی اور دہشتگردی کے خلاف پاک فوج کے عزم پر تبادلہ خیال کیا گیا۔
ایران کا اسرائیل پر خیبر شکن میزائلوں سے جوابی وار، ویڈیو جاری
شرکاء نے ڈی جی آئی ایس پی آر کا والہانہ خیرمقدم کیا اور قومی یکجہتی کے فروغ میں پاک فوج کے کردار کو سراہا۔ لیفٹیننٹ جنرل احمد شریف نے اس موقع پر کہا کہ پاکستان میں تمام مذاہب کے ماننے والے برابر کے شہری ہیں اور آئین انہیں مکمل حقوق فراہم کرتا ہے۔ انہوں نے زور دیا کہ قومی اتحاد برابری اور ہم آہنگی سے ہی ممکن ہے۔
ڈی جی آئی ایس پی آر نے کہا کہ بھارت پاکستان میں دہشتگردی کی پشت پناہی کر رہا ہے اور پاک فوج جدید جنگی حکمت عملی کے ذریعے دشمن کے مذموم عزائم کو ناکام بنا رہی ہے۔
انہوں نے کہا کہ نسلی یا لسانی نفرت جہالت ہے، تمام پاکستانی برابر ہیں اور اگر متحد رہیں گے تو کوئی طاقت ہمیں شکست نہیں دے سکتی۔
لیفٹیننٹ جنرل احمد شریف نے واضح کیا کہ جہاد کا اعلان صرف ریاست کا اختیار ہے اور کسی فرد یا گروہ کو یہ حق حاصل نہیں ہے۔
مختلف مذاہب اور سماجی طبقات کے نمائندوں نے اس ملاقات کو قابلِ قدر قرار دیتے ہوئے کہا کہ اس نوعیت کی نشستیں قومی ہم آہنگی کے لیے ضروری ہیں اور ان کا تسلسل برقرار رہنا چاہیے۔
