اسلام آباد – وفاقی وزیر داخلہ محسن نقوی نے عید الاضحی کے پیش نظر ایکسپریس وے پر قائم بکرا منڈی کا دورہ کیا۔ انہوں نے منڈی میں بیوپاریوں اور شہریوں کے لیے فراہم کردہ سہولیات کا جائزہ لیا اور انتظامات پر اطمینان کا اظہار کیا۔
وزیر داخلہ نے موقع پر ہی پارکنگ کے لیے علیحدہ ایریا مختص کرنے، فی جانور فیس میں مناسب کمی کرنے اور منڈی کی جگہ کو مزید وسیع کرنے کے احکامات جاری کیے۔ انہوں نے صفائی، روشنی، اور پانی کی فراہمی کو بہتر بنانے کی ہدایت بھی کی۔
محسن نقوی نے منڈی میں موجود بیوپاریوں سے ملاقات کی، ان کے مسائل سنے اور انتظامات کے متعلق براہ راست دریافت کیا۔ بیوپاریوں نے موسم کی شدت اور گاہکوں کی کم تعداد پر بھی وزیر داخلہ کو آگاہ کیا۔
منڈی میں وزیر داخلہ نے ایک سفید بیل میں خصوصی دلچسپی لی، جس کی قیمت 18 لاکھ روپے اور وزن 14 من سے زائد بتایا گیا۔ انہوں نے بیل کی خوبصورتی کی تعریف کی۔
وزیر داخلہ نے شہریوں سے بھی ملاقات کی اور ان کی شکایات پر فوری کارروائی کرتے ہوئے منڈی سے ملحقہ کراسنگ پل کی مرمت کا حکم جاری کیا۔
یہ اقدامات شہریوں اور بیوپاریوں کو بہتر سہولیات فراہم کرنے کی جانب ایک مثبت قدم ہیں تاکہ عید الاضحی کے موقع پر خریدو فروخت آسان اور خوشگوار بنائی جا سکے۔