پاکستان کے معروف کوہ پیما سرباز خان نے نیپال میں واقع دنیا کی تیسری بلند ترین چوٹی ماؤنٹ کنچن جنگا (8586 میٹر) کو بغیر اضافی آکسیجن کے کامیابی سے سر کر لیا ہے۔ اس شاندار کامیابی کے ساتھ وہ دنیا کی 8000 میٹر سے بلند تمام 14 پہاڑی چوٹیوں کو بغیر آکسیجن سر کرنے والے پہلے پاکستانی بن گئے ہیں۔
مودی کی ناکام سفارت کاری بے نقاب، عالمی سطح پر پاکستان کا مؤقف غالب، بھارت تنہا
اتوار کی صبح پاکستانی وقت کے مطابق 4:15 بجے، سرباز خان نے کنچن جنگا کو سر کر کے کوہ پیمائی کی تاریخ میں ایک نیا سنگ میل عبور کیا۔ ان کے اس کارنامے پر ملک بھر میں خوشی اور فخر کی لہر دوڑ گئی ہے، خاص طور پر گلگت بلتستان میں، جہاں سے ان کا تعلق ہے۔
امیجن نیپال، جو ان کے ٹور آرگنائزر بھی ہیں، نے اس کامیابی پر دل کی گہرائیوں سے مبارکباد پیش کرتے ہوئے کہا کہ سرباز خان نے کوہ پیمائی میں پاکستانی عزم، حوصلے اور مہارت کو دنیا کے سامنے رکھا ہے۔
الپائن کلب آف پاکستان کے سیکرٹری کرار حیدری کے مطابق، "یہ کارنامہ صرف جسمانی طاقت نہیں بلکہ غیر معمولی حوصلے، برداشت اور خالص جذبے کی نمائندگی کرتا ہے۔ سرباز نے بغیر کسی اضافی آکسیجن کے دنیا کی بلند ترین چوٹیاں سر کر کے پوری قوم کا سر فخر سے بلند کر دیا ہے۔”
یہ کامیابی کوہ پیمائی کے خالص "الپائن انداز” میں حاصل کی گئی، یعنی نہ تو کوئی اضافی آکسیجن، نہ ہی شرپاؤں کی طرف سے لگائی گئی رسیاں یا کیمپنگ کا سہارا۔ یہ انداز کوہ پیمائی کی سب سے مشکل اور خالص شکل تصور کیا جاتا ہے۔
سرباز خان کی سر کی گئی 8000 میٹر سے بلند 14 چوٹیاں:
ماؤنٹ ایورسٹ (8848 میٹر)
کے ٹو (8611 میٹر)
کنچن جنگا (8586 میٹر)
لوٹسے (8516 میٹر)
مکلو (8485 میٹر)
چو اویو (8188 میٹر)
دھولاگیری (8167 میٹر)
مناسلو (8163 میٹر)
نانگا پربت (8126 میٹر)
اناپورنا اول (8091 میٹر)
گاشر برم اول (8080 میٹر)
براڈ پیک (8051 میٹر)
گاشر برم دوم (8035 میٹر)
شیشاپانگما (8027 میٹر)
سرباز خان نے 2016 میں کوہ پیمائی کا آغاز کیا اور ان کے مشن کا مقصد پاکستان کا نام دنیا کی بلند ترین چوٹیوں پر فخر سے بلند کرنا ہے۔ ان کی کئی مہمات میں معروف کوہ پیما مرحوم محمد علی سدپارہ بھی شریک رہے۔
انہوں نے ایک موقع پر کہا تھا، "میں اپنے مرشد علی سدپارہ کے خواب کو پورا کرنے کے قریب ہوں۔ ان کا بھی خواب تھا کہ وہ دنیا کی 14 بلند ترین چوٹیوں کو سر کریں، لیکن بدقسمتی سے وہ کے ٹو پر موسم سرما کی مہم کے دوران جاں بحق ہوگئے۔”
پاکستانی کوہ پیما نائلہ کیانی، ساجد سدپارہ، مختلف سیاسی شخصیات اور سول سوسائٹی نے سرباز خان کو ان کی تاریخی کامیابی پر مبارکباد پیش کی ہے۔