پاکستان مسلم لیگ فنکشنل کے صدر ضلع کورنگی تنویر چودھری نے کراچی میں نوجوانوں کی جانب سے پرائیویٹ اور ہیوی ڈیوٹی ٹرانسپورٹ کو نظرآتش کرنے کی مذمت کرتے ہوئے کہا کہ یہ افسوس ناک عمل ہے۔ انہوں نے کہا کہ نوجوانوں کو ہیوی ٹرالر اور ٹرانسپورٹ کو آگ لگانے کے مشورے دینے والوں کو شرم آنی چاہئے۔
تنویر چودھری نے مزید کہا کہ گورنمنٹ سندھ اور ٹریفک پولیس کے احکامات کے مطابق، کراچی کے نوجوانوں کو خود قانون کو اپنے ہاتھوں میں لینے کے بجائے، ہیوی ڈیوٹی ٹرانسپورٹ اور ٹرانسپورٹ کی شکایات متعلقہ قانون نافذ کرنے والے اداروں کو کرنی چاہیے۔
انہوں نے نوجوانوں سے درخواست کی کہ وہ اپنے روزگار پر دھیان دیں اور غیر قانونی طور پر چلنے والی ٹرانسپورٹ کے بارے میں ٹریفک پولیس کو اطلاع دیں۔
تنویر چودھری نے کہا کہ قانون نافذ کرنے والے ادارے سندھ حکومت کے نوٹیفکیشن کے تحت ٹرانسپورٹر حضرات کے خلاف سخت قانونی کارروائی کریں۔
انہوں نے اپنے نوجوان بھائیوں سے مؤدبانہ گزارش کی کہ وہ جذباتی ہو کر یا سیاستدانوں کی جذباتی تقریروں کا اثر لے کر کوئی غیر قانونی اقدام نہ اٹھائیں، تاکہ بعد میں انہیں کسی پشیمانی کا سامنا نہ ہو۔