پاکستان کی انسداد منشیات فورس (اے این ایف) نے تعلیمی اداروں کے گردونواح اور ملک کے مختلف شہروں میں منشیات اسمگلنگ کے خلاف کریک ڈاؤن کیا۔ اس دوران 9 مختلف کارروائیوں میں 9 ملزمان کو گرفتار کیا گیا اور ان سے 107.2 کلو گرام منشیات برآمد کی گئی، جن کی مالیت 11 کروڑ روپے سے زائد بتائی جا رہی ہے۔
تعلیمی اداروں میں ہونے والی کارروائیوں میں اسلام آباد کے ایف 8 میں پارک کے قریب ایک ملزم سے 2.4 کلو گرام چرس، کھنہ پل ایکسپریس وے اسلام آباد کے قریب 100 گرام آئس اور 48 نشہ آور گولیاں برآمد ہوئیں۔ اسی طرح اسلام آباد میں ایک کالج کے قریب ملزم کے قبضے سے 500 گرام چرس برآمد کی گئی اور راولپنڈی میں یونیورسٹی کے قریب 70 نشہ آور گولیاں قبضے میں لیں گئیں۔ گرفتار ملزمان نے اعتراف کیا کہ وہ تعلیمی اداروں میں طلباء کو منشیات فروخت کر رہے تھے۔
دیگر کارروائیوں میں کراچی میں کوریئر آفس کے ذریعے آسٹریلیا بھیجے جانے والے پارسل سے 10.75 کلو گرام آئس برآمد کی گئی، جو لیڈیز سوٹس میں چھپائی گئی تھی۔ پشاور کے انٹرنیشنل ایئرپورٹ پر جدہ جانے والے ایک مسافر کے ٹرالی بیگ سے 2.85 کلو گرام آئس برآمد کی گئی۔ بلوچستان کے ضلع قلعہ سیف اللہ میں 63 کلو گرام ہیروئن پکڑی گئی، جبکہ سرینگر ہائی وے اسلام آباد کے قریب ایک کار کے خفیہ خانوں سے 18 کلو گرام چرس برآمد کی گئی اور 2 ملزمان گرفتار کیے گئے۔
سواں اڈا بس اسٹاپ راولپنڈی کے قریب ایک کار میں چھپائی گئی 9.6 کلو گرام چرس برآمد کی گئی اور 2 ملزمان کو گرفتار کیا گیا۔ تمام گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
