کراچی (تشکر نیوز) – پاک بحریہ کملاگ کمانڈ کی سالانہ ایفیشنسی ایوارڈ تقریب ۲۰۲۴ پاکستان نیوی ڈاکیارڈ کراچی میں منعقد ہوئی۔ تقریب کے مہمان خصوصی وائس چیف آف دی نیول اسٹاف، وائس ایڈمرل اویس احمد بلگرامی تھے۔ یہ تقریب ہر سال کملاگ کمانڈ کے مقاصد کی تکمیل میں بہترین کارکردگی دکھانے والے افراد اور یونٹس کو سراہنے کے لیے منعقد کی جاتی ہے۔
مہمان خصوصی وائس ایڈمرل اویس احمد بلگرامی نے تقریب سے خطاب کرتے ہوئے کہا کہ انتھک محنت، مضبوط عزم، اور غیر متزلزل جذبہ پاکستان نیوی ڈاکیارڈ کی شناخت ہیں۔ انہوں نے ایوارڈ حاصل کرنے والے افراد کو مبارکباد دی اور انہیں اسی جذبے کے ساتھ کام جاری رکھنے کی تلقین کی۔
تقریب کے آغاز میں کمانڈر لاجسٹکس، ریئر ایڈمرل محمد سہیل ارشد نے سال ۲۰۲۴ کے دوران کملاگ کمانڈ کی آپریشنل کامیابیوں پر روشنی ڈالی اور کہا کہ چیلنجز کے باوجود کملاگ کمانڈ نے تمام اہداف کامیابی سے حاصل کیے ہیں۔ ان کا کہنا تھا کہ پیشہ ورانہ مہارت کملاگ کمانڈ کی پہچان ہے اور ہمیشہ رہے گی۔
تقریب کے دوران نمایاں کارکردگی کا مظاہرہ کرنے والے افراد اور یونٹس کو ایوارڈز سے نوازا گیا۔ اس موقع پر کملاگ کمانڈ کے سینئر حاضر سروس اور ریٹائرڈ افسران، سی پی اوز، سیلرز، اور نیوی سویلینز کی بڑی تعداد نے شرکت کی۔