تشکر نیوز: انسداد منشیات فورس (اے این ایف) نے تعلیمی اداروں کے اطراف میں منشیات فروشی اور اسمگلنگ کے خلاف کریک ڈاؤن میں تیزی لاتے ہوئے گزشتہ 24 گھنٹوں کے دوران دو کامیاب کارروائیوں میں چار ملزمان کو گرفتار کرلیا ہے۔ ان کارروائیوں کے دوران 13 کلوگرام منشیات برآمد کی گئی، جس کی مالیت 9 لاکھ روپے سے زائد ہے۔
کراچی میں نماز جمعہ کے دوران سیکیورٹی الرٹ، پولیس کی خصوصی ہدایات جاری
پہلی کارروائی اقبال شہید ٹول پلازہ، اٹک کے قریب کی گئی، جہاں ایک رکشہ سے 950 گرام چرس برآمد کی گئی اور ملزم کو گرفتار کرلیا گیا۔ گرفتار ملزم نے تفتیش کے دوران اعتراف کیا کہ وہ تعلیمی اداروں کے طلباء کو منشیات فروخت کرتا تھا۔ اے این ایف حکام کے مطابق منشیات سے پاک تعلیمی اداروں کا قیام ان کی اولین ترجیح ہے۔
دوسری کارروائی موٹروے ٹول پلازہ، اسلام آباد کے قریب کی گئی، جہاں ایک کار سے 12 کلوگرام چرس برآمد ہوئی اور تین ملزمان کو گرفتار کیا گیا۔ گرفتار ملزمان کے خلاف انسداد منشیات ایکٹ کے تحت مقدمات درج کر کے مزید تحقیقات کا آغاز کر دیا گیا ہے۔
اے این ایف کی ان کامیاب کارروائیوں سے منشیات فروشوں کے نیٹ ورک کو شدید دھچکا پہنچا ہے، اور حکام اس بات پر عزم ہیں کہ تعلیمی اداروں کو منشیات سے پاک بنانے کے لیے یہ کارروائیاں جاری رہیں گی۔