تشکر نیوز: وفاقی وزیر احسن اقبال نے کہا ہے کہ دھرنوں، لانگ مارچ، اور عدالتوں کے فیصلوں نے ہمیں مشکلات میں مبتلا کیا، اور ایک غیر تجربہ کار کو اقتدار میں لایا گیا۔ لاہور میں میڈیا سے گفتگو کرتے ہوئے انہوں نے کہا کہ ہمیں ایک دوسرے کو چور ڈاکو کہنے کے بجائے پاکستانی بن کر کام کرنا چاہیے، اور اگر اگلے پانچ سال امن میں ملے تو ایک مستحکم پاکستان بن سکتا ہے۔ ملکی ترقی کے لیے پوری یکسوئی سے کام کرنا ضروری ہے، اور آزادی کے مہینے میں ہمیں سوچنا ہوگا کہ پاکستان کے ساتھ کیا کچھ ہوچکا ہے۔
ملک کے مختلف حصوں میں بارش سے موسم خوشگوار، کئی علاقے زیر آب
احسن اقبال نے مزید کہا کہ اربوں ڈالر کی زرعی برآمدات سے ملکی وسائل میں اضافہ کیا جا سکتا ہے۔ پاکستان کو درپیش مشکلات سے نکلنے میں زراعت اہم کردار ادا کر سکتی ہے، اور ملک میں ایک نئے زرعی انقلاب کی بنیاد رکھی جا رہی ہے۔ انہوں نے وضاحت کی کہ گرین ریولوشن کی بنیاد ٹیکنالوجی پر ہوگی، جس سے زرعی ترقی میں اضافہ ہوگا۔
انہوں نے اس بات پر بھی زور دیا کہ پاکستان کو برآمدات میں اضافہ کرنا ہوگا تاکہ ملک ترقی کی راہ پر گامزن ہو سکے۔ پاکستان میں ہزاروں ایگرو پراسیس یونٹس چل رہے ہیں، اور دنیا اس وقت اپنے قومی برانڈز سے ترقی کر رہی ہے، ہمیں بھی یہی کرنا ہے۔ پاکستان کے ریونیو میں اضافہ کے لیے ضروری ہے کہ ہماری انڈسٹری اپنی مصنوعات کی کوالٹی کو بین الاقوامی معیار تک لے جائے، جیسے ارشد ندیم نے پاکستان کا پرچم بلند کر کے دکھایا ہے۔