کراچی میں سندھ کے وزیر محنت و افرادی قوت سعید غنی کی جانب سے وزیر اعلیٰ گلگت بلتستان امجد حسین ایڈووکیٹ اور گورنر گلگت بلتستان مہدی شاہ کے اعزاز میں عشائیہ دیا گیا۔ تقریب میں وزیر اعلیٰ سندھ مراد علی شاہ، صوبائی وزرا، ارکان اسمبلی اور پاکستان پیپلز پارٹی کے عہدیداران نے شرکت کی۔
عشائیے کا اہتمام صوبائی ہم آہنگی اور سندھ و گلگت بلتستان کے درمیان تعلقات کو مزید مضبوط بنانے کے لیے کیا گیا۔ تقریب کے دوران باہمی تعاون، سیاسی روابط اور قومی یکجہتی کے امور پر گفتگو ہوئی۔
سعید غنی اور چنیسر ٹاؤن کے چیئرمین فرحان غنی نے مہمانوں کا استقبال کیا اور انہیں پھولوں کے گلدستے پیش کیے۔
تقریب میں اسپیکر سندھ اسمبلی سید اویس قادر شاہ، صوبائی وزرا سید ناصر حسین شاہ، سید ذوالفقار شاہ اور مکیش چاولہ سمیت دیگر وزرا اور ارکان سندھ اسمبلی بھی شریک ہوئے۔ پیپلز پارٹی کراچی ڈویژن کے عہدیداران، ضلعی صدور و جنرل سیکریٹریز، پیپلز لیبر بیورو سندھ کے صدر حبیب الدین جنیدی اور مختلف ٹاؤنز کے چیئرمینز نے بھی شرکت کی۔
سندھ اور گلگت بلتستان کے تعلقات
وزیر اعلیٰ گلگت بلتستان امجد حسین ایڈووکیٹ نے کہا کہ سندھ کے دورے کے دوران انہیں وزیر اعلیٰ سندھ، کابینہ کے ارکان اور پارٹی رہنماؤں سے ملاقات کا موقع ملا۔ ان ملاقاتوں سے انہیں اندازہ ہوا کہ سندھ حکومت اور پاکستان پیپلز پارٹی کی قیادت گلگت بلتستان کے عوام سے دلی محبت رکھتی ہے۔
انہوں نے کہا کہ گلگت بلتستان سے تعلق رکھنے والے افراد سندھ میں رہتے ہوئے حکومت کی جانب سے کیے جانے والے اقدامات سے بھی خوش ہیں۔
امجد حسین ایڈووکیٹ نے سعید غنی، فرحان غنی اور دیگر میزبانوں کا شکریہ ادا کیا اور ان کے لیے نیک خواہشات کا اظہار کیا۔
کراچی کی واک فوڈ اسٹریٹ کا دورہ
عشائیے کے بعد وزیر اعلیٰ گلگت بلتستان امجد حسین ایڈووکیٹ نے صوبائی وزرا سعید غنی اور سید ناصر حسین شاہ، فرحان غنی اور دیگر شخصیات کے ہمراہ سندھی مسلم روڈ پر چنیسر ٹاؤن کی جانب سے قائم کی گئی واک فوڈ اسٹریٹ کا دورہ کیا۔
میزبانوں نے فوڈ اسٹریٹ کے منصوبے اور اس کی خصوصیات سے آگاہ کیا۔ وفد نے اسے پاکستان میں اپنی نوعیت کی پہلی اور اعلیٰ معیار کی واک فوڈ اسٹریٹ قرار دیا۔
