کراچی کے علاقے سرجانی ٹاؤن میں پولیس نے مبینہ مسلح ڈاکوؤں کے ساتھ مقابلے کے بعد ایک زخمی ملزم سمیت 3 افراد کو گرفتار کرلیا۔ پولیس کے مطابق گرفتار افراد میں ایک خاتون بھی شامل ہے۔ ملزمان کے قبضے سے غیر قانونی پستول، ایمونیشن، 8 موبائل فون اور ایک لیڈیز پرس برآمد ہوا ہے۔
ترجمان ایس ایس پی ڈسٹرکٹ ویسٹ کے مطابق 28 اکتوبر 2026 کو تھانہ سرجانی کی چوکی خدا کی بستی پولیس نے روزی گوٹھ ہائیڈرنٹ کے قریب کارروائی کی۔ اس دوران پولیس اور مسلح ملزمان کے درمیان دوطرفہ فائرنگ کا تبادلہ ہوا۔
پولیس کے مطابق مقابلے میں مرزا ہاشم ولد مرزا ممتاز زخمی ہوگیا، جسے گرفتار کرکے طبی امداد کے لیے اسپتال منتقل کردیا گیا۔ دیگر گرفتار افراد کی شناخت سیف اللہ خان ولد دور خان اور نادیہ ہاشم زوجہ مرزا ہاشم کے ناموں سے ہوئی ہے۔ پولیس کا کہنا ہے کہ دونوں کو بغیر زخمی ہوئے گرفتار کیا گیا۔
پولیس نے گرفتار ملزمان کے قبضے سے غیر قانونی پستول، ایمونیشن، چلیدہ خول، چھینے گئے 8 موبائل فون اور ایک لیڈیز پرس برآمد کرنے کا دعویٰ کیا ہے۔ ملزمان کے زیر استعمال موٹرسائیکل بھی تحویل میں لے لی گئی ہے۔
ترجمان کے مطابق گرفتار افراد کو مزید قانونی کارروائی کے لیے تھانے منتقل کیا جارہا ہے۔ ملزمان کا سابقہ مجرمانہ ریکارڈ بھی حاصل کیا جارہا ہے جبکہ واقعے سے متعلق مزید تفصیلات جمع کی جارہی ہیں۔
