کنٹرول لائن کے دونوں اطراف اور دنیا بھر میں مقیم کشمیری آج 27 اکتوبر کو یومِ سیاہ منا رہے ہیں۔ اس موقع پر پاکستان میں خصوصی تقریبات، احتجاجی مظاہروں اور ریلیوں کا اہتمام کیا گیا ہے۔ پاکستانی قیادت نے کشمیری عوام کے حقِ خودارادیت کی حمایت جاری رکھنے کے عزم کا اعادہ کیا ہے۔
اسلام آباد کے ڈی چوک پر وزارت امور کشمیر کے زیر اہتمام خصوصی تقریب منعقد ہوئی۔ اس دوران سائرن بجائے گئے اور ایک منٹ کی خاموشی اختیار کی گئی۔
نائب وزیراعظم اور وزیر خارجہ اسحاق ڈار نے تقریب سے خطاب کرتے ہوئے کہا کہ یومِ سیاہ منانے کا مقصد دنیا کو بھارت کے اقدامات سے آگاہ کرنا اور کشمیری عوام کی آواز عالمی سطح پر بلند کرنا ہے۔
انہوں نے کہا کہ پاکستان نے مسئلہ کشمیر کو دنیا کے مختلف فورمز پر اجاگر کیا ہے۔ ان کے مطابق، اسلامی تعاون تنظیم (او آئی سی) کے 57 رکن ممالک کے سامنے بھی یہ معاملہ اٹھایا گیا ہے۔
اسحاق ڈار نے کہا کہ بھارت نے 5 اگست 2019 کو یک طرفہ اقدامات کے ذریعے مسئلے کو مزید پیچیدہ کیا۔ انہوں نے کہا کہ پاکستان اقوام متحدہ کی جنرل اسمبلی سمیت ہر بین الاقوامی فورم پر کشمیری عوام کے حقوق کی حمایت کرتا رہے گا۔
نائب وزیراعظم نے اس عزم کا اظہار کیا کہ پاکستان جموں و کشمیر کے عوام کی سیاسی اور سفارتی حمایت جاری رکھے گا۔
امیر مقام کا کشمیریوں کے حقِ خودارادیت پر زور
وفاقی وزیر امور کشمیر و گلگت بلتستان انجینئر امیر مقام نے ڈی چوک میں تقریب سے خطاب کرتے ہوئے کہا کہ کشمیری عوام نے طویل عرصے سے مشکلات اور قربانیوں کا سامنا کیا ہے، لیکن ان کا عزم کمزور نہیں ہوا۔
انہوں نے 27 اکتوبر 1947 کو کشمیری تاریخ کا سیاہ دن قرار دیا اور کہا کہ کشمیری عوام کو اپنے مستقبل کا فیصلہ کرنے کا حق ملنا چاہیے۔
امیر مقام نے دعویٰ کیا کہ مقبوضہ کشمیر میں اب تک 97 ہزار سے زائد شہری جان سے ہاتھ دھو بیٹھے ہیں۔ انہوں نے کہا کہ پاکستان کشمیری عوام کے جائز مطالبات کی حمایت جاری رکھے گا۔
وزیراعظم شہباز شریف کا پیغام
وزیراعظم شہباز شریف نے یومِ سیاہ کشمیر کے موقع پر اپنے پیغام میں کہا کہ 27 اکتوبر 1947 کو بھارتی افواج کی سری نگر آمد نے خطے کی تاریخ میں ایک طویل اور المناک باب کا آغاز کیا۔
انہوں نے کہا کہ کشمیری عوام اب تک اقوام متحدہ کی سلامتی کونسل کی متعلقہ قراردادوں میں تسلیم شدہ حقِ خودارادیت سے محروم ہیں۔ ان کے مطابق، کشمیری عوام نے مشکلات اور جبر کے باوجود اپنے بنیادی حقوق کے لیے جدوجہد جاری رکھی ہے۔
وزیراعظم نے کشمیری سیاسی رہنماؤں، کارکنوں اور انسانی حقوق کے محافظوں کی طویل قید پر بھی تشویش ظاہر کی۔ انہوں نے عالمی برادری پر زور دیا کہ وہ مقبوضہ جموں و کشمیر میں بنیادی آزادیوں اور انسانی حقوق کی صورتحال پر توجہ دے۔
شہباز شریف نے کہا کہ 5 اگست 2019 کے بعد بھارت کے یک طرفہ اقدامات نے علاقے کی سیاسی، قانونی اور آبادیاتی حیثیت کو متاثر کیا ہے۔ پاکستان کا مؤقف ہے کہ تنازعے کا حل بین الاقوامی قوانین اور اقوام متحدہ کی متعلقہ قراردادوں کے مطابق ہونا چاہیے۔
وزیراعظم نے کہا کہ جنوبی ایشیا میں پائیدار امن کے لیے مسئلہ کشمیر کا منصفانہ اور پُرامن حل ضروری ہے۔ انہوں نے اس عزم کا اعادہ کیا کہ پاکستان کشمیری عوام کی اخلاقی، سیاسی اور سفارتی حمایت جاری رکھے گا۔
صدر زرداری کا عالمی برادری سے مطالبہ
صدر مملکت آصف علی زرداری نے اپنے پیغام میں اقوام متحدہ اور بین الاقوامی انسانی حقوق کی تنظیموں پر زور دیا کہ وہ مقبوضہ جموں و کشمیر میں انسانی حقوق کی صورتحال کا سنجیدگی سے نوٹس لیں۔
انہوں نے کہا کہ عالمی برادری تنازعے کے منصفانہ، پُرامن اور پائیدار حل کے لیے مؤثر کردار ادا کرے۔
صدر مملکت نے 27 اکتوبر 1947 کو کشمیری تاریخ کا المناک دن قرار دیتے ہوئے حقِ خودارادیت کے لیے کشمیری عوام کی جدوجہد کی حمایت کا اعادہ کیا۔
دنیا بھر میں احتجاجی سرگرمیاں
یومِ سیاہ کے موقع پر مقبوضہ جموں و کشمیر میں مکمل ہڑتال اور احتجاجی مظاہروں کا اعلان کیا گیا ہے۔ دنیا کے مختلف ممالک میں مقیم کشمیری بھی ریلیوں اور دیگر سرگرمیوں کے ذریعے اپنا احتجاج ریکارڈ کرا رہے ہیں۔
مظفرآباد میں شاہراہِ سری نگر پر کنٹرول لائن کی جانب مارچ کا بھی اعلان کیا گیا ہے۔ شرکا ہٹیاں بالا میں بھارت کے خلاف احتجاج کریں گے۔
آزاد جموں و کشمیر کے شہریوں نے بھی مطالبہ کیا ہے کہ کشمیری عوام کو اقوام متحدہ کی قراردادوں کے مطابق اپنے سیاسی مستقبل کا فیصلہ کرنے کا حق دیا جائے۔ ان کا کہنا تھا کہ 27 اکتوبر 1947 کے واقعات کے خلاف کشمیریوں کی جدوجہد آج بھی جاری ہے۔
ہر سال 27 اکتوبر کو یومِ سیاہ منانے کا مقصد عالمی برادری کی توجہ مسئلہ کشمیر کی جانب مبذول کرانا اور کشمیری عوام کے حقِ خودارادیت کے مطالبے کو اجاگر کرنا ہے۔
