ضلع ملیر پولیس کے مطابق، تھانہ شرافی گوٹھ کی ٹیم نے علی الصبح ملیر ندی بند کے قریب کچرا کنڈی، لانڈھی میں اسٹریٹ کرائم کے خلاف کارروائی کی۔ اس دوران مسلح ملزمان کے ساتھ فائرنگ کا تبادلہ ہوا۔
فائرنگ کے تبادلے میں ایک ملزم زخمی
پولیس کے مطابق، فائرنگ کے تبادلے کے بعد اہلکاروں نے عزیر شاہ ولد تاجیر شاہ کو زخمی حالت میں گرفتار کرلیا۔ اس کا مبینہ ساتھی فضل ولد گل رادون موٹر سائیکل پر فرار ہوگیا اور جاتے ہوئے فائرنگ بھی کی۔
پولیس نے گرفتار ملزم کے قبضے سے ایک پستول، ایمونیشن اور نقدی برآمد کرنے کا بتایا ہے۔
زخمی ملزم جناح اسپتال منتقل
پولیس نے زخمی ملزم کو فوری طبی امداد کے لیے جناح اسپتال منتقل کردیا۔ حکام کے مطابق، گرفتار ملزم اور فرار ہونے والے اس کے ساتھی کا سابقہ مجرمانہ ریکارڈ حاصل کیا جارہا ہے۔
پولیس کا کہنا ہے کہ مفرور ملزم کی گرفتاری کے لیے چھاپے مارے جارہے ہیں۔ واقعے سے متعلق مزید تفتیش جاری ہے۔
