وزیر داخلہ سندھ ضیاء الحسن لنجار نے سینٹرل پولیس آفس (سی پی او) کراچی کا دورہ کیا۔ آئی جی سندھ جاوید عالم اوڈھو اور دیگر سینئر افسران نے ان کا استقبال کیا۔
انہوں نے یادگارِ شہداء پر حاضری دی۔ پھول چڑھائے، فاتحہ خوانی کی اور شہدائے پولیس کے درجات کی بلندی کے لیے دعا کی۔
بعدازاں وزیر داخلہ نے کمانڈ اینڈ کنٹرول سینٹر کا دورہ کیا۔ حکام نے انہیں چہلم حضرت امام حسینؓ کے سیکیورٹی پلان پر بریفنگ دی۔
افسران نے مرکزی جلوس، دیگر جلوسوں، مجالس اور حساس مقامات کے انتظامات سے آگاہ کیا۔ وزیر داخلہ نے مانیٹرنگ کا نظام بھی دیکھا۔
ضیاء الحسن لنجار نے کہا کہ چہلم کے موقع پر کسی قسم کی غفلت برداشت نہیں ہوگی۔ تمام روٹس اور حساس مقامات پر فول پروف سیکیورٹی یقینی بنائی جائے۔
انہوں نے ہدایت دی کہ پولیس جدید ٹیکنالوجی سے مسلسل نگرانی کرے۔ کمانڈ اینڈ کنٹرول سینٹر ہر صورتحال پر نظر رکھے۔
وزیر داخلہ نے کہا کہ تمام پولیس افسران اور اہلکار مکمل الرٹ رہیں۔ وہ اپنے فرائض پوری ذمہ داری سے انجام دیں۔
انہوں نے کہا کہ عزاداروں کو محفوظ اور پُرامن ماحول فراہم کیا جائے۔ اس مقصد کے لیے تمام دستیاب وسائل استعمال کیے جائیں۔
ضیاء الحسن لنجار نے قانون نافذ کرنے والے اداروں کو مؤثر رابطہ برقرار رکھنے کی ہدایت دی۔ انہوں نے کسی بھی ہنگامی صورتحال میں فوری رسپانس یقینی بنانے پر بھی زور دیا۔
