پلازہ کیس میں سٹی کورٹ کی ایڈیشنل ڈسٹرکٹ اینڈ سیشن جج جنوبی کی عدالت نے تنویر پاستا سمیت چھ ملزمان کی عبوری ضمانت منظور کر لی۔
عدالت نے ہر بالغ ملزم کو پانچ، پانچ لاکھ روپے کے مچلکے جمع کرانے کا حکم دیا۔
عدالت نے 11 سالہ حذیفہ کی عبوری ضمانت 10 ہزار روپے کے مچلکے کے عوض منظور کی۔
ضمانت کی درخواست تنویر پاستا، عمار اسماعیل، محمد رمضان، محمد امین، نعمت اللہ اور حذیفہ نے دائر کی۔
عدالت کے سوالات
سماعت کے دوران عدالت نے پوچھا کہ کم عمر ملزم کی درخواست اس عدالت میں کیوں دائر کی گئی۔
وکیل صفائی نے بتایا کہ تمام ملزمان ایک ہی چالان میں نامزد ہیں، اس لیے درخواست بھی یہیں دائر کی گئی۔
عدالت نے استفسار کیا کہ کم عمر بچے کا مقدمے میں کیا کردار ہے۔
عدالت نے کہا کہ کم عمر ملزم کی ضمانت متعلقہ جووینائل عدالت سے حاصل کی جائے۔
عدالت نے مزید کہا کہ کم عمر ملزم کے لیے الگ عدالت موجود ہے۔
چالان پر عدالت کے ریمارکس
عدالت نے کہا کہ پولیس نے ملزمان کو گرفتار نہیں کیا۔
عدالت کے مطابق چارج شیٹ دو مرتبہ مسترد ہو چکی ہے۔
عدالت نے کہا کہ پولیس نے وہی اعتراضات برقرار رکھتے ہوئے دوبارہ چالان جمع کرایا۔
وکیل صفائی کا مؤقف
وکیل صفائی نے کہا کہ سانحے میں 72 افراد جان سے گئے۔
انہوں نے مؤقف اختیار کیا کہ پولیس نے مختصر چالان جمع کرایا۔
وکیل نے کہا کہ کسی بھی سرکاری ادارے پر ذمہ داری عائد نہیں کی گئی۔
انہوں نے کہا کہ تنویر پاستا پر صرف بجلی بند کرانے کا الزام ہے۔
وکیل کے مطابق آج ہر شخص کے پاس موبائل فون اور ٹارچ موجود ہوتی ہے۔
انہوں نے کہا کہ نعمت اللہ کم عمر حذیفہ کے والد ہیں۔
وکیل نے دعویٰ کیا کہ گل پلازہ یونین نے ساڑھے تین ہزار افراد کی جانیں بچائیں۔
انہوں نے کہا کہ یونین کا ایک عہدیدار بھی واقعے میں جان سے گیا۔
وکیل نے مؤقف اختیار کیا کہ اصل ذمہ داروں کے بجائے متاثرہ افراد کو مقدمے میں نامزد کیا جا رہا ہے۔
