کوئٹہ اور بلوچستان کے مختلف علاقوں میں بلوچ یکجہتی کمیٹی (بی وائی سی) کی جانب سے دی گئی شٹر ڈاؤن ہڑتال کی کال پر کاروباری سرگرمیاں معطل رہیں۔
نیو کراچی انڈسٹریل ایریا پولیس کی بڑی کارروائی، بین الصوبائی موٹر سائیکل لفٹر گینگ کے کارندے گرفتار
یہ ہڑتال پولیس کے گزشتہ روز کیے گئے کریک ڈاؤن کے خلاف بطور احتجاج کی گئی، جس میں بی وائی سی کے کارکنان پر مبینہ طور پر تشدد کیا گیا، جو جبری گمشدگیوں کے خلاف مظاہرہ کر رہے تھے۔
حکومتی اور بی وائی سی کے بیانات کے مطابق کارروائی کے دوران جانی نقصان بھی ہوا۔ بی وائی سی نے دعویٰ کیا کہ ان کے تین کارکن جاں بحق اور 13 زخمی ہوئے، جبکہ پولیس کے مطابق 10 اہلکار زخمی ہوئے۔
بلوچ یکجہتی کمیٹی کی چیف آرگنائزر، ڈاکٹر ماہ رنگ بلوچ نے مبینہ اموات پر ردعمل دیتے ہوئے صوبے بھر میں ہڑتال کی کال دی اور اعلان کیا کہ وہ مرنے والوں کی لاشوں کے ہمراہ کوئٹہ کے سریاب روڈ پر دھرنا دیں گے۔
کوئٹہ، چاغی، خضدار، مستونگ، تربت اور دیگر اضلاع میں ہڑتال کے باعث بازار بند رہے اور سڑکوں پر ٹریفک معطل رہی، جبکہ بعض علاقوں میں مظاہرین نے سڑکیں بلاک کرنے کے لیے ٹائر جلائے۔
بلوچستان میں کئی مقامات پر پولیس اور مظاہرین کے درمیان جھڑپیں بھی ہوئیں۔ تربت میں نامعلوم افراد کی فائرنگ سے دو بچے زخمی ہوگئے، جبکہ حکومتی ترجمان کے مطابق مظاہرین کے پتھراؤ سے 10 پولیس اہلکار زخمی ہوئے۔
دریں اثنا، بی وائی سی نے دعویٰ کیا کہ ڈاکٹر ماہ رنگ بلوچ سمیت کئی کارکنان کو گرفتار کر لیا گیا، جبکہ بلوچستان بار کونسل اور پی ٹی آئی نے پولیس کے طاقت کے استعمال کی مذمت کرتے ہوئے گرفتار مظاہرین کی فوری رہائی کا مطالبہ کیا۔
