وزیراعلیٰ سندھ سید مراد علی شاہ سے چین کے قونصل جنرل یانگ یونڈونگ نے ملاقات کی، جس میں سی پیک کے جاری منصوبوں اور نئے ترقیاتی پروجیکٹس پر بات چیت کی گئی۔
وزیراعلیٰ سندھ نے کہا کہ صدر مملکت آصف زرداری کی چین کے صدر سے ملاقات کے بعد ترقی کی نئی راہیں کھلی ہیں۔ انہوں نے مزید کہا کہ کراچی میں پانی کے مختلف منصوبے اور سولر پروجیکٹس چین کے تعاون سے شروع کیے جا رہے ہیں۔
وزیراعلیٰ سندھ نے اپنے آئندہ دورۂ چین کا عندیہ دیتے ہوئے کہا کہ اس دوران میگا پروجیکٹس طے کیے جائیں گے۔
چینی قونصل جنرل یانگ یونڈونگ نے کہا کہ چینی سرمایہ کار سندھ میں مزید سرمایہ کاری کے لیے تیار ہیں اور دونوں ممالک جدید زرعی ٹیکنالوجی اور تحقیق میں تعاون کو مزید فروغ دیں گے۔
وزیراعلیٰ سندھ نے مزید کہا کہ چیئرمین بلاول بھٹو چین کے ساتھ تعلقات کو خصوصی اہمیت دیتے ہیں اور ان کے بطور وزیر خارجہ چین کے دورے دوطرفہ تعلقات کے لیے نہایت اہم رہے۔
