ملک میں چینی کی قیمتوں میں غیر معمولی اضافے کے بعد وفاقی حکومت نے خام چینی درآمد کرنے کا فیصلہ کیا ہے تاکہ مقامی منڈی میں استحکام لایا جا سکے۔ یہ فیصلہ ایسے وقت میں سامنے آیا ہے جب چند ہفتے قبل ہی حکومت نے 5 لاکھ ٹن چینی برآمد کرنے کی اجازت دی تھی، جس کے بدلے صنعت نے قیمتیں 145 سے 150 روپے فی کلو برقرار رکھنے کا وعدہ کیا تھا۔ تاہم، اب چینی 180 روپے فی کلو تک جا پہنچی ہے۔
کینسر میں مبتلا اداکارہ و ہدایت کارہ انجلین ملک کی مداحوں سے دعاؤں کی اپیل
حکومتی اعلامیے کے مطابق، خام چینی درآمد کرکے مقامی ریفائنریوں میں پروسیسنگ کی جائے گی تاکہ مارکیٹ میں چینی کی دستیابی یقینی بنائی جا سکے اور قیمتوں میں کمی آئے۔
تاہم ماہرین اور مارکیٹ تجزیہ کار اس فیصلے کو تاخیر پر مبنی اور غیر موثر قرار دے رہے ہیں۔ ان کا کہنا ہے کہ درآمدی عمل میں 10 سے 15 ہفتے لگ سکتے ہیں، جس وقت تک مقامی صنعت اربوں روپے منافع کما چکی ہوگی اور عوام مہنگی چینی خریدنے پر مجبور ہوں گے۔
ایک شہری محمد امین نے اس صورتحال پر مایوسی کا اظہار کرتے ہوئے کہا کہ "یہ وہی دائروی عمل ہے جس میں ہم بار بار پھنس جاتے ہیں، جہاں حکومت کی نااہلی اور کمزور گورننس بے نقاب ہو جاتی ہے۔”
ماہرین کا کہنا ہے کہ چینی کی قیمتوں میں موجودہ اضافہ سپلائی کا مسئلہ نہیں بلکہ انتظامی ناکامی ہے۔ ان کے مطابق، اس وقت ملک کرشنگ سیزن کے درمیان ہے، چینی کی پیداوار جاری ہے، اس کے باوجود قیمتوں کا بڑھنا اس بات کی نشاندہی کرتا ہے کہ حکومت صنعت کو اپنے وعدے پر عمل درآمد کروانے میں ناکام رہی ہے۔
لاہور سے ایک تاجر غلام عباس نے کہا کہ "یہ فیصلہ حکومت کی بے بسی اور ناکامی کا ثبوت ہے۔ برآمدات کی اجازت دینا شروع سے ہی ایک غلط فیصلہ تھا اور اب درآمد کی طرف جانا اپنی ناکامی کو عوام پر ڈالنے کی کوشش ہے۔”
انہوں نے مزید کہا کہ "اگر حکومت نے شفاف حکمت عملی کے بغیر برآمدات کی اجازت نہ دی ہوتی تو آج یہ صورتحال نہ بنتی۔ اب درآمد کے فیصلے سے صرف بحران میں مزید اضافہ ہوگا اور قیمتیں کم ہونے کے بجائے بڑھ سکتی ہیں۔”
تجزیہ کاروں کا کہنا ہے کہ حکومت کی جانب سے بار بار غلط فیصلے نہ صرف عوامی اعتماد کو متاثر کر رہے ہیں بلکہ مارکیٹ کی شفافیت اور قانون کی بالادستی پر بھی سوالات اٹھا رہے ہیں۔