کراچی: آئی جی سندھ غلام نبی میمن کی زیر صدارت سینٹرل پولیس آفس میں ایک اہم اجلاس منعقد ہوا، جس میں رمضان المبارک کے دوران اسٹریٹ کرائم کی روک تھام اور امن و امان کی موجودہ صورتحال کا جائزہ لیا گیا۔
ایس ایس پی ایسٹ ڈاکٹر فرخ رضا کی زیر صدارت اہم اجلاس، رمضان میں سیکیورٹی سخت کرنے کے احکامات
اجلاس میں ایڈیشنل آئی جی کراچی، ڈی آئی جی اسپیشل برانچ، سی آئی اے، فنانس، زونل ڈی آئی جیز، ضلعی ایس ایس پیز، اور تفتیشی شعبے کے افسران نے شرکت کی، جبکہ دیگر افسران وڈیولنک کے ذریعے اجلاس میں شامل ہوئے۔
اہم ہدایات:
منشیات مافیا کے خلاف سخت کارروائی: آئی جی سندھ نے پولیس حکام کو منشیات مافیا کا نیٹ ورک توڑنے، مفرور ملزمان کو گرفتار کرنے اور عدالتوں میں ان کے خلاف مضبوط شواہد پیش کرنے کی ہدایت کی۔
اسٹریٹ کرمنلز کے خلاف کریک ڈاؤن: آئی جی سندھ کے مطابق اسٹریٹ کرائم کی زیادہ تر وارداتوں میں منشیات کے عادی اور مفرور ملزمان ملوث ہوتے ہیں، اس لیے سندھ پولیس کو غیر معمولی اقدامات کرنا ہوں گے۔
ضلعی افسران کو متحرک رہنے کا حکم: تمام ضلعی افسران کو ہدایت دی گئی کہ وہ فیلڈ میں موجود رہیں، بازاروں، مارکیٹوں اور شاہراہوں کا دورہ کریں، اور تاجر تنظیموں و شہریوں سے قریبی رابطہ رکھیں۔
سی سی ٹی وی اور انٹیلیجنس میں بہتری: پولیس کو ہدایت کی گئی کہ وہ بازاروں اور مارکیٹوں میں لگے کیمروں کی مدد سے مجرموں پر نظر رکھیں اور سڑکوں پر رات کے وقت پولیس سرویلینس سسٹم قائم کریں۔
ہوٹلز، مسافر خانوں اور فیکٹریوں کی نگرانی: ہوٹل آئی، ای وی ایم اور دیگر موبائل ایپلیکیشنز کے ذریعے مطلوب ملزمان کی تلاش اور گرفتاری کو یقینی بنایا جائے۔
آئی جی سندھ نے زور دیا کہ رمضان میں پولیس فورس کو زیادہ مستعد رہنا ہوگا تاکہ شہریوں کو محفوظ ماحول فراہم کیا جا سکے۔