سندھ کے سینئر وزیر شرجیل انعام میمن نے ڈاکٹر فاروق ستار کے الزامات کو مسترد کرتے ہوئے انہیں "سیاسی شعبدہ بازی” قرار دیا ہے۔ ان کا کہنا تھا کہ سندھ حکومت نے پچھلے پانچ سال میں 160 ارب روپے کے بقایاجات اور پنشن کی ادائیگیاں کی ہیں، جبکہ کراچی کے بلدیاتی اداروں کو اضافی 20 ارب روپے بھی فراہم کیے گئے۔
کراچی کے بلدیاتی ملازمین کے 25 ارب واجبات، ڈاکٹر فاروق ستار کا شدید احتجاج
بلدیاتی ادارے خودمختار، سندھ حکومت پر بے جا الزام
شرجیل میمن نے واضح کیا کہ کے ایم سی، کے ڈی اے اور واٹر بورڈ جیسے ادارے خودمختار ہیں اور اپنی مالی ذمہ داریوں کے خود ذمہ دار ہیں۔ ایم کیو ایم کی سابقہ ناقص حکمرانی اور کرپشن کے باعث یہ ادارے مالی بحران کا شکار ہوئے۔
ایم کیو ایم کے دور میں کرپشن کے الزامات
سندھ کے وزیر نے کہا کہ ایم کیو ایم کے دور میں بلدیاتی اداروں میں جعلی بھرتیاں ہوئیں، کرپشن کی گئی اور مالی وسائل کا غلط استعمال کیا گیا، جس کی وجہ سے آج کے ڈی اے، کے ایم سی اور دیگر ادارے بحران میں مبتلا ہیں۔
ثبوت فراہم کریں، حکومت شفاف آڈٹ کے لیے تیار
شرجیل میمن نے کہا کہ اگر فاروق ستار کو 25 ارب روپے کے غائب ہونے کا دعویٰ ہے تو وہ ثبوت فراہم کریں، حکومت آزادانہ آڈٹ کے لیے تیار ہے۔ سندھ حکومت شفافیت کے اصولوں پر عمل پیرا ہے اور جلد ایم کیو ایم کے مالی بدعنوانیوں پر مبنی "حقیقت نامہ” عوام کے سامنے لائے گی۔
ایم کیو ایم عوام کو گمراہ کر رہی ہے
انہوں نے مزید کہا کہ ایم کیو ایم کراچی میں اپنی سیاسی ساکھ کھو چکی ہے اور عوام کو گمراہ کرنے کے لیے بے بنیاد الزامات لگا رہی ہے۔ سندھ حکومت کراچی اور حیدرآباد میں بڑے ترقیاتی منصوبے مکمل کر رہی ہے، جبکہ ایم کیو ایم کے دور میں شہر کھنڈر میں تبدیل ہو گیا تھا۔