تشکر نیوز کے مطابق قومی اسمبلی کی قائمہ کمیٹی برائے صنعت و پیداوار کا اجلاس حفیظ الدین کی زیر صدارت منعقد ہوا، جس میں یوٹیلیٹی اسٹورز سے ڈیلی ویجز ملازمین کو نوکریوں سے فارغ کرنے کے معاملے پر وزیر صنعت و پیداوار اور سیکریٹری صنعت سمیت متعلقہ اداروں کو نوٹس جاری کیے گئے اور تفصیلی رپورٹ طلب کی گئی۔ کمیٹی نے کہا کہ سفارشات کے باوجود یہ غیر قانونی اقدام اٹھایا گیا، اور کابینہ کی جانب سے بنائی گئی اصلاحاتی کمیٹی کی رپورٹ بھی طلب کی گئی۔
سینیٹ کمیٹی برائے توانائی کا اجلاس، وزیراعظم کے معاون خصوصی محمد علی کی بریفنگ
کمیٹی نے اس بات پر زور دیا کہ وزیر صنعت و پیداوار نے پارلیمنٹ کو یقین دہانی کرائی تھی کہ ایسے اقدامات نہیں کیے جائیں گے۔ مزید یہ کہ قائمہ کمیٹی نے وزارت صنعت و پیداوار کو ہدایت کی کہ یوٹیلیٹی اسٹورز سے مزید ملازمین کو نہ نکالا جائے اور ملک بھر میں نکالے گئے ملازمین کی تفصیلات بھی فراہم کی جائیں۔
ایم ڈی یوٹیلٹی اسٹورز نے کمیٹی کو بتایا کہ اسٹورز کو منافع بخش ادارہ بنانے کے لیے اقدامات کیے جا رہے ہیں۔ تاہم، گزشتہ ہفتے سینیٹ اجلاس میں وزیر صنعت و پیداوار رانا تنویر حسین نے یوٹیلیٹی اسٹورز کی بندش کے حوالے سے پالیسی بیان میں کہا تھا کہ یوٹیلیٹی اسٹورز بند نہیں کیے جائیں گے بلکہ نجکاری کی جائے گی جس کے لیے اصلاحاتی عمل اپنایا جا رہا ہے۔
کمیٹی کے رکن آغا رفیع اللہ نے کم سے کم اجرت کی ادائیگی نہ ہونے کا معاملہ اٹھایا جس پر کمیٹی نے حکومت کی طے کردہ کم سے کم اجرت پر عمل درآمد نہ ہونے پر شدید تحفظات کا اظہار کیا۔ کمیٹی ارکان نے کہا کہ ملک میں ٹھیکداری نظام کا غلط استعمال ہو رہا ہے اور طے کردہ اجرت کسی بھی ادارے میں دستیاب نہیں ہے، جس کے نتیجے میں پارلیمنٹ سے کم سے کم اجرت قانون پر عملدرآمد کرانے کی درخواست کی گئی۔ اس معاملے کو قائمہ کمیٹی نے قومی اسمبلی کو ریفر کر دیا۔