کراچی: ایم ڈی واٹر کارپوریشن انجینئر اسداللہ خان نے ہدایت دی ہے کہ رمضان المبارک کے دوران شہر بھر میں پانی کی بلا تعطل فراہمی کو یقینی بنایا جائے اور پانی کی لائنوں میں موجود رساؤ کا مکمل خاتمہ کیا جائے۔ انہوں نے کہا کہ اس مقدس مہینے میں شہریوں کو بہتر سہولیات فراہم کرنا کسی عبادت سے کم نہیں، اور اس حوالے سے کسی قسم کی کوتاہی برداشت نہیں کی جائے گی۔
ضلع کیماڑی: تھانہ سائیٹ بی پولیس کی کامیاب کارروائیاں، اسٹریٹ کرمنلز گرفتار
ترجمان واٹر کارپوریشن کے مطابق، حکام نے پانی کی لائنوں کی مرمت کا کام شروع کرنے کا فیصلہ کیا ہے۔ مرمتی کام منوں گوٹھ، گلشن اقبال، اور پیلی کوہٹی لیاقت آباد میں کیا جائے گا، جبکہ ایف ٹی ایم کی 48 انچ ڈایا لائن اور سی ٹی ایم 54 انچ ڈایا لائن کی مرمت آج 22 فروری ہفتے کے روز سے شروع ہوگی، جو اگلے 72 گھنٹوں میں مکمل کی جائے گی۔ یہ کام 24 گھنٹے مسلسل جاری رہے گا تاکہ مقررہ وقت پر مکمل ہو سکے۔
ترجمان نے مزید بتایا کہ مرمتی کام مکمل ہونے کے بعد شہر بھر میں پانی کی فراہمی مزید بہتر ہوگی، تاہم مرمت کے دوران لیاقت آباد، ناظم آباد، پاک کالونی، گولیمار، شیر شاہ، اولڈ سٹی ایریا، لانڈھی، کورنگی اور پی اے ایف بیس مسرور میں پانی کی فراہمی جزوی طور پر متاثر رہے گی۔
انہوں نے بتایا کہ کراچی کو یومیہ 650 ایم جی ڈی پانی فراہم کیا جاتا ہے، تاہم مرمتی کام کے دوران شہر کو یومیہ 250 ایم جی ڈی پانی کی کمی کا سامنا ہوگا، جبکہ 400 ایم جی ڈی پانی کی فراہمی معمول کے مطابق جاری رہے گی۔ شہریوں سے درخواست کی گئی ہے کہ وہ پانی کا ذخیرہ کریں اور احتیاط سے استعمال کریں تاکہ کسی بھی ممکنہ پریشانی سے بچا جا سکے۔